ఉత్తరకొరియా దుస్సాహసం! సిరియాలోని రసాయనిక ఆయుధాల ఫ్యాక్టరీలకు ముడిసరుకుల సరఫరా!?
న్యూయార్క్: ఉత్తరకొరియా ఆగడాలు శృతిమించిపోతున్నాయి. ఆ దేశాన్ని పాలిస్తున్న నియంత కిమ్ జోంగ్ ఉన్ ప్రపంచానికే ప్రమాదకరంగా మారుతున్నాడు. అగ్రరాజ్యం అమెరికాతో 'ఢీ అంటే ఢీ' అంటోన్న సంగతి తెలిసిందే. ఉత్తరకొరియా కట్టడికి ఇటు అమెరికా, అటు ఐక్యరాజ్యసమితి ఎన్ని చర్యలు తీసుకుంటున్నా ఉపయోగం లేకుండా పోతోంది.
అగ్రరాజ్యం అమెరికా ఇప్పటికే ఐక్యరాజ్య సమితిచే ఉత్తరకొరియాపై పలు ఆంక్షలు విధింపజేసింది. ఆ దేశం నుంచి ఇతర దేశాలకు ఎగుమతులను కూడా నిషేధించింది. అయినా సరే అటు రష్యా, ఇటు చైనా సహాయంతో.. ఉత్తరకొరియా రహస్యంగా ఎగుమతులు చేస్తూనే ఉంది.
సిరియాలో రసాయనిక ఆయుధాలు...
అసలే అంతర్యుద్ధంతో సిరియా అట్టుడికిపోతోండగా ఉత్తరకొరియా అగ్నికి ఆజ్యంలా ఆ దేశానికి రహస్యంగా రసాయనిక ఆయుధాల తయారీకి అవసరమైన వస్తువులు సరఫరా చేస్తోంది. వేర్పాటువాద మిలిటెంట్లు, ఉగ్రవాద సంస్థలు, ప్రభుత్వ దళాల మధ్య నిత్యం బాంబు దాడులు, తుపాకుల మోత సిరియా దద్దరిల్లిపోతోంది. వేర్పాటువాదులను ఏరిపారేసేందుకు సిరియా ప్రభుత్వం శతవిధాల ప్రయత్నిస్తోంది. ఈ నేపథ్యంలో రసాయనిక ఆయుధాల ప్రయోగానికి కూడా అక్కడి ప్రభుత్వం వెనకాడడం లేదు. గతంలో క్లోరిన్ వాయువును ప్రయోగించి మిలిటెంట్లతోపాటు వందలాది మంది పౌరుల ప్రాణాలు తీసిన సిరియన్ ప్రభుత్వం ఇప్పుడు రసాయన ఆయుధాల తయారీకోసం ఫ్యాక్టరీలే స్థాపించినట్లు తెలుస్తోంది.
Recommended Video
క్లోరిన్ వాయువుతో మారణహోమం...
సిరియాలో ప్రభుత్వ దళాలు మిలిటెంట్లను మట్టుపెట్టేందుకు రకరకాలుగా ప్రయత్నిస్తున్నాయి. తుపాకులు, బాంబులు, చివరికి రసాయనిక ఆయుధాలు ప్రయోగించడానికి కూడా సిరియన్ ప్రభుత్వం వెనకాడడం లేదు. గతంలో ఒకసారి క్లోరిన్ వాయువును ప్రయోగించగా మిలిటెంట్ల మాట అటుంచి దాని ప్రభావానికి వివిధ ప్రాంతాల్లో వందలాది మంది చిన్నారుల ప్రాణాలు గాల్లో కలిసిపోయాయి. వారంతా నిద్రలోంచే శాశ్వత నిద్రలోకి జారిపోవడంతో ఈ ప్రయోగం వెలుగులోకి వచ్చింది. ఈ చర్యతో సిరియా ప్రభుత్వం కూడా పెద్ద ఎత్తున ఆరోపణలు ఎదుర్కొంది. తాము రసాయనిక ఆయుధాలు ప్రయోగించడం లేదంటూ పైకి బొంకినా అది నిజం కాదని ప్రపంచ దేశాలకు తెలుసు.
చేతులు కలిపిన ఉత్తరకొరియా...
తాజాగా ప్రపంచానికే పెను ప్రమాదంగా పరిణమించిన ఉత్తరకొరియాతో సిరియా ప్రభుత్వం చేతులు కలిపినట్లు తెలుస్తోంది. వరుస క్షిపణి పరీక్షలతో అగ్రరాజ్యం అమెరికా సహా ప్రపంచ దేశాలను గడగడలాడించిన ఉత్తరకొరియా నియంత కిమ్ జోంగ్ ఉన్ సిరియాతో రహస్య సంబంధాలు నెరుపుతున్నట్లు అంతర్జాతీయ మీడియా కోడై కూస్తోంది. తాజాగా ఐక్య రాజ్య సమితి కూడా ఈ విషయాన్ని ఓ నివేదికలో పేర్కొంది. సిరియాలో రసాయనిక ఆయుధాల ఉత్పత్తి కోసం ఏర్పాటు చేసిన ఫ్యాక్టరీలకు ఉత్తరకొరియా నుంచి అవసరమైన సామగ్రి అందుతోందనేది తాజా ఆరోపణ. 20012-2017 మధ్య నలభై కంటే ఎక్కువ సార్లు ఉత్తరకొరియా నుంచి సిరియాకు వివిధ సామగ్రి సరఫరా అయినట్లు ఐక్యరాజ్య సమితి ఓ నివేదికలో పేర్కొంది.
ఎక్విప్మెంట్ ఉత్తరకొరియా నుంచే...
అంతర్యుద్ధంంతో రగులుతున్న సిరియాకు.. ఉత్తరకొరియా రసాయనిక ఆయుధాల తయారీకి అవసరమయ్యే సామగ్రి, ఇతర వస్తువులు సరఫరా చేస్తోందట. ఈ విషయాన్ని అమెరికా మీడియాయే బయటపెట్టింది. మరోవైపు ఐక్యరాజ్య సమితి నిపుణులు ఈ విషయాన్ని వెల్లడించారు. యాసిడ్ రెసిస్టెంట్ టైల్స్, వాల్వ్స్, పైపులు తదితర సామగ్రిని సిరియాకు అమ్ముతోందట. అంతేకాదు, సిరియాలో ఉన్న ఆయుధాల తయారీ ఫ్యాక్టరీలో ఉత్తరకొరియా క్షిపణి స్పెషలిస్టులు కూడా కనిపించినట్లు ఐక్యరాజ్య సమితి తన నివేదికలో పేర్కొంది. ఈ ఫ్యాక్టరీల్లో తయారయ్యే రసాయనిక ఆయుధాలను సిరియా ప్రభుత్వం మిలిటెంట్లు, ఉగ్రవాదుల ఏరివేతకు వినియోగిస్తున్నట్లు తెలుస్తోంది.
Click it and Unblock the Notifications
Sign in with Google