US-China Summit: మళ్లీ సైనిక చర్చలకు అమెరికా-చైనా ఓకే-అయినా జిన్ పింగ్ నియంతేనన్న బైడెన్..

ప్రపంచాన్ని శాసిస్తున్న రెండు అగ్రరాజ్యాల అధినేతలు ఒక్క చోట చేరారు. ఇరుదేశాల మధ్య దశాబ్దాలుగా సాగుతున్న వాణిజ్య యుద్ధాలు, సైనిక మోహరింపులు, విన్యాసాలు, అంతర్జాతీయ పరిణామాలపై మాట్లాడుకున్నారు. చివరికి కలిసి పనిచేయాలని నిర్ణయించుకున్నారు. అయినా అందులో ఒకరు మరొకరిని నియంతగానే తేల్చేశారు. అమెరికా-చైనా అధ్యక్షుల మధ్య జరిగిన తాజా భేటీ సందర్భంగా చోటు చేసుకున్న పరిణామాలివి.

అమెరికా-చైనా మధ్య పచ్చగడ్డి వేస్తే భగ్గుమంటున్న పరిస్ధితుల్లో ఇరుదేశాల అధినేతలు జో బైడెన్-షీ జిన్ పింగ్ ఇవాళ శాన్ ఫ్రాన్సిస్కోలో భేటీ అయ్యారు. ఈ ఏడాది తొలిసారి కలుసుకున్న వీరిద్దరూ ఇరుదేశాలకు సంబంధించిన పలు కీలక అంశాలపై చర్చించారు. ఆసియా-పసిఫిక్ ఆర్ధిక సహకార సదస్సు సందర్భంగా వీరిద్దరూ భేటీ అయ్యారు. తాము బహిరంగ చర్చల్ని, సమాచార మార్పిడిని తిరిగి ప్రారంభించినట్లు ఈ భేటీ అనంతరం అమెరికా అధ్యక్షుడు జో బైడెన్ వ్యాఖ్యానించారు.

చైనా తాజాగా తైవాన్ చుట్టూ సైనిక విన్యాసాలు నిర్వహించింది. అయితే దాని నౌకాదళం దక్షిణ చైనా సముద్రంలో ఫిలిప్పీన్స్‌తో ప్రతిష్టంభనలో భాగంగా అమెరికాతో పోటీగా సైనిక విన్యాసాలు చేపట్టింది. చైనా నౌకలు దాదాపుగా అమెరికన్ దళాలతో ముఖాముఖీ అయిన కొన్ని సంఘటనల నేపథ్యంలో సమావేశమైన చైనా అధ్యక్షుడు షీ జిన్ పింగ్ తో భేటీ అయిన బైడెన్.. సైనిక చర్చల్ని పునరుద్ధరించాలని కోరారు. కొన్ని కీలక అంశాల్లో సమాచార లోపాల వల్ల అసలైన ఇబ్బందులు ఎదురవుతాయని బైడెన్ ఈ సందర్భంగా చెప్పారు. అలాగే జిన్ పింగ్ ను నియంత అన్న తన వ్యాఖ్యలకు కట్టుబడి ఉన్నట్లు తెలిపారు.

గతంలో అమెరికా గగనతలంలో చైనా గూఢచర్య బెలూన్ ను గుర్తించిన తర్వాత దాన్ని కూల్చేసింది. ఇది నిఘా బెలూనే అంటూ అమెరికా, కాదు పరిశోధనల కోసం పంపిన బెలూన్ అంటూ చైనా వాదించుకున్నాయి. ఆ తర్వాత జూన్‌లో, సింగపూర్‌లో జరిగిన వార్షిక భద్రతా శిఖరాగ్ర సమావేశానికి ఇరు దేశాలకు చెందిన డిఫెన్స్ చీఫ్‌లు హాజరయ్యారు. అయితే వారు అధికారికంగా సమావేశం కాలేదు. ఇప్పుడు ఆసియా-పసిఫిక్ ఆర్ధిక సహకార సదస్సుకు హాజరైన సందర్భంగా బైడెన్-జిన్ పింగ్ భేటీ అయ్యారు.

బైడెన్ తో భేటీలో జిన్ పింగ్..అమెరికాతో చైనా సంబంధాలలో తైవాన్ ఎల్లప్పుడూ అత్యంత ముఖ్యమైన, సున్నితమైన సమస్య అని ప్రస్తావించారు. అలాగే తైవాన్ స్వాతంత్రానికి మద్దతివ్వడం, ఆ దేశానికి ఆయుధాలు అందించడం, చైనా పునరేకీరణ ప్రయత్నాలకు అడ్డంకిగా మారుతుందని బైడెన్ కు చెప్పినట్లు ఆ దేశ మీడియా వెల్లడించింది. తైవాన్ ను చైనాలో భాగంగా గుర్తించడంతో పాటు ఆ ప్రాంతం స్వతంత్రంగా చేసే దౌత్య ప్రయత్నాలను సమర్ధించవద్దని కోరినట్లు సమాచారం.

English summary

US and China have agreed to resume high-level military talks during joe biden and xi jinping's meeting today.