హైఅలర్ట్ .. జర్మనీ నుంచి హైదరాబాద్‌ వస్తున్న విమానానికి బాంబు బెదిరింపు

ఎయిర్ ఇండియా విమానం ప్రమాదం ఘటనతో ప్రపంచం అంతా ఒక్కసారిగా ఉలిక్కిపడింది. విమానంలోని ప్రయాణికులు, సిబ్బంది మాత్రమే కాకుండా.. మెడికల్ విద్యార్థులు సైతం ఈ ప్రమాదంలో ప్రాణాలు కోల్పోయారు. ఈ ప్రమాదంలో మరణించిన వారి సంఖ్య 274కు చేరగా.. యావత్తు దేశాన్ని ఈ ఘటన కలిచివేసింది. ఈ విషాద ఘటన నుంచి ఇంకా కోలుకోకముందే మరో విమానానికి బాంబు బెదిరింపులు రావడం సర్వత్రా చర్చనీయాంశంగా మారింది.

జర్మనీలోని ఫ్రాంక్‌ఫర్ట్ నుంచి హైదరాబాద్‌కు బయలుదేరిన లుఫ్తాన్సా ఎయిర్‌లైన్స్‌కు చెందిన విమానం, బాంబు బెదిరింపు కారణంగా మధ్యలోనే తిరిగి వెనక్కి ప్రయాణించింది. భద్రతా కారణాల వల్ల తీసుకున్న ఈ చర్య ప్రయాణికుల్లో ఆందోళన కలిగించింది. ఇది ఆదివారం మధ్యాహ్నం 2:14 గంటలకు (భారత కాలమానం ప్రకారం సాయంత్రం 5:44కి) ఫ్రాంక్‌ఫర్ట్ ఎయిర్‌పోర్ట్ నుంచి బయలుదేరింది. ఈ విమానం షెడ్యూల్ ప్రకారం సోమవారం తెల్లవారుజామున హైదరాబాద్‌లోని రాజీవ్ గాంధీ అంతర్జాతీయ విమానాశ్రయానికి చేరుకోవాల్సింది.

అయితే సుమారు రెండు గంటల ప్రయాణం తర్వాత విమానం ఇంకా భారత గగనతలంలోకి రాకముందే బాంబు బెదిరింపు సమాచారాన్ని అందుకున్న అధికారులు, అప్రమత్తమై వెంటనే విమానాన్ని తిరిగి ఫ్రాంక్‌ఫర్ట్‌కు మళ్లించారు. దీంతో ఆదివారం సాయంత్రం 5:30 (IST ప్రకారం రాత్రి 9 గంటల ప్రాంతంలో) విమానం మళ్లీ ఫ్రాంక్‌ఫర్ట్‌లో సురక్షితంగా ల్యాండ్ అయింది. లుఫ్తాన్సా ఎయిర్‌లైన్స్‌కు చెందిన ఎల్‌హెచ్‌ 752 అనే విమానం బోయింగ్ 787-9 డ్రీమ్‌లైనర్ మోడల్‌కి చెందినది.

కాగా మొదట్లో, లుఫ్తాన్సా అధికార ప్రతినిధులు ఈ విమానం హైదరాబాద్ ల్యాండింగ్ అనుమతి పొందలేదని వెల్లడించినా.. తర్వాత భారత అధికారులు స్పష్టంగా బాంబు బెదిరింపు నేపథ్యంలో విమానం వెనక్కి మళ్లించబడిందని వెల్లడించినట్టు స్పష్టం అవుతోంది. ఫ్లైట్‌ మళ్లించిన అనంతరం, విమానాన్ని అధికారుల ఆధీనంలోకి తీసుకొని పూర్తి భద్రతా పరిశీలన చేపట్టారు.

English summary

entire world was shocked by the Air India plane crash. Before the tragedy could be fully resolved, another plane was targeted by bomb threats, which became a hot topic of discussion.