గొప్ప మనస్సు చాటుకున్న సీఎం రేవంత్ రెడ్డి
హైదరాబాద్కు చెందిన రఘు, మంజుల దంపతుల ముద్దుల కూతురు వేదవల్లి (5) ప్రాణాంతక వ్యాధికి బలైంది. 2022లో తీవ్ర జ్వరంతో బాధపడుతున్న వేదవల్లికి బ్లడ్ క్యాన్సర్ (అనాప్లాస్టిక్ లార్జ్ సెల్ లార్జ్ లింఫోమా) అని వైద్యులు నిర్ధారించడంతో ఆ తల్లిదండ్రుల ప్రపంచం తలకిందులైంది.
తమ బిడ్డను కాపాడుకోవడానికి రఘు, మంజుల రెండేళ్లపాటు ఎన్నో ఆసుపత్రుల చుట్టూ తిరిగారు. అప్పటికే ఆర్థికంగా చితికిపోయిన ఆ కుటుంబం 2024లో తమ గోడును ముఖ్యమంత్రి రేవంత్ రెడ్డికి విన్నవించుకుంది. మానవత్వం చూపిన ముఖ్యమంత్రి వెంటనే స్పందించి, బసవతారకం క్యాన్సర్ ఆసుపత్రిలో వేదవల్లి చికిత్స కోసం రూ. 8 లక్షలు మంజూరు చేశారు.
అయితే, విధి వక్రీకరించింది. ఎంత చికిత్స అందించినా, వ్యాధి ముదరడంతో గతేడాది చివరిలో వేదవల్లి కన్నుమూసింది. అప్పటికే పాప చికిత్స కోసం ఆ కుటుంబం లక్షలు ఖర్చు చేసింది. ఈ విషయాన్ని తెలుసుకున్న రేవంత్ రెడ్డి చలించిపోయారు. ఆ కుటుంబాన్ని ఆర్థికంగా ఆదుకునేందుకు మరో రూ. 7 లక్షలు ముఖ్యమంత్రి సహాయ నిధి (సీఎంఆర్ఎఫ్) నుంచి విడుదల చేయాలని ఆదేశించారు.
గురువారం సచివాలయంలో సీఎం ప్రత్యేక విధుల్లోని అధికారి (ఓఎస్డీ) వేముల శ్రీనివాసులు ఆ రూ. 7 లక్షల చెక్కును వేదవల్లి తండ్రి రఘుకు అందజేశారు. అల్లారుముద్దు కుమార్తెను కోల్పోయిన దుఃఖంలో ఉన్న ఆ తండ్రికి, ముఖ్యమంత్రి చూపిన మానవత్వం కొంత ఊరటనిచ్చింది. ఒకవైపు తీరని వేదన, మరోవైపు ముఖ్యమంత్రి అందించిన ఆర్థిక సహాయం... ఈ విషాద ఘటన మానవ సంబంధాల గొప్పతనాన్ని, ప్రభుత్వ స్పందన ఆవశ్యకతను మరోసారి గుర్తుచేసింది.
Click it and Unblock the Notifications
Sign in with Google