కుక్క పంచాయితీ .. మహిళలను విచక్షణారహితంగా కొట్టిన కాంగ్రెస్ లీడర్

Updated: Tuesday, April 23, 2019, 10:14 [IST]

వారిది ఆస్తుల పంచాయితీ కాదు. డబ్బుల కోసం పడిన గొడవ అంతకంటే కాదు. వేరే ఇతరత్రా కారణాలు కూడా లేవు. కానీ వారు గొడవ పడ్డారు. విచక్షణా రహితంగా దాడి చేసుకున్నారు. ఒక కాంగ్రెస్ నేత కుక్క కోసం ఇద్దరు మహిళలను చావ చితక్కొట్టారు. ఓ కుక్క పంచాయితీ వారిని రోడ్డుకీడ్చింది . పోలీస్ స్టేషన్లో కేసు నమోదయ్యేదాకా పోయింది. అసలు ఇంతకీ మ్యాటర్ ఏమిటంటే..

కుక్క పెట్టిన పంచాయితీ .. పోలీస్ స్టేషన్ దాకా చేరిన గొడవ

ఓ కుక్క రెండు కుటుంబాల మధ్య చిచ్చు పెట్టింది. పరస్పరం ఒకరిపై మరొకరు పిడిగుద్దులు గుద్దుకునేలా వివాదం సృష్టించింది. కుక్క తెచ్చిన తంటాతో జరిగిన రచ్చ ఆ కుటుంబాలను రోడ్డు మీద పడేలా చేసింది . పెద్దపల్లి జిల్లా గాంధీనగర్‌లో కాంగ్రెస్‌ పార్టీ కార్యదర్శి కట్కూరి సందీప్‌ నివాసం ఉంటున్నాడు. ఇతనికి ఓ పెంపుడు కుక్క ఉంది. ఆ కుక్క పక్కింట్లో బహిర్భూమికి వెళ్లింది. ఇదే విషయాన్ని పక్కింటి మహిళలు...సందీప్‌కు చెప్పారు. అక్కడ గొడవ స్టార్ట్ అయ్యింది . మాటామాటా పెరిగింది. దీంతో ఆగ్రహించిన సందీప్‌ ఇద్దరు మహిళలను విచక్షణా రహితంగా బాదేశాడు .చావ చితక్కొట్టాడు.

కుక్క కోసం ఇద్దరు మహిళల్ని చావబాదిన కాంగ్రెస్ నేత

ఇరుగు పొరుగు వారు సర్దిచెబుతున్నప్పటికీ సందీప్‌ ఆగలేదు. ఎవరు అడ్డు పడుతున్నా మహిళలపై తన ప్రతాపాన్ని చూపించాడు .అక్కడ ఉన్న వారు సందీప్ మహిళలపై చేస్తున్న దాడిని తమ సెల్ ఫోన్ లలో బంధించారు . ఎవరు అడ్డుకున్నా ఆగకుండా , వారు క్రింద పడిపోయినా వదలకుండా సందీప్ పిడిగుద్దులు గుద్దాడు . వాళ్ళు అరుస్తున్నా , ఏడుస్తున్నా వదలకుండా మహిళలను వీరబాదుడు బాదాడు.

వీడియో ఆధారంగా కేసు నమోదు చేసుకున్న పోలీసులు

సందీప్ మహిళల మీద పడి గొడ్డును బాదినట్లు బాదేశాడు. ఇక సందీప్ మహిళలపై చేసిన దాడి వీడియో ఆధారంగా కేసు నమోదు చేసుకున్న పోలీసులు దర్యాప్తు చేస్తున్నారు. ఈ వీడియో చూసిన వారంతా మహిళలు అన్న విచక్షణ కూడా లేకుండా గొడ్డును బాదినట్టు బాదుతుండటం చూసి అవాక్కయ్యారు. కేవలం కుక్క కోసం ఇంతగా దాడి చేస్తున్నాడా అని నివ్వెరపోయారు.