కేజ్రీవాల్ ముడుపుల అంశంపై ఆధారాలతో కవితను ఉక్కిరిబిక్కిరి చేస్తున్న ఈడీ.. బిగుస్తున్న ఉచ్చు!!

ఢిల్లీ లిక్కర్ కుంభకోణంలో పరిణామాలు శరవేగంగా మారుతున్నాయి. ఈ కేసులో కీలకంగా తెలంగాణ ఎమ్మెల్సీ కవితను అరెస్ట్ చేసి విచారణ సాగిస్తున్న ఈడీ అధికారులు, ఈ కేసులో ప్రధాన సూత్రధారి అయిన అరవింద్ కేజ్రీవాల్ ను సైతం కస్టడీలోకి తీసుకొని విచారిస్తున్న విషయం తెలిసిందే. అయితే కేజ్రీవాల్ టార్గెట్ గా కవితను ప్రశ్నిస్తున్న ఈడీ అధికారులు కేజ్రీవాల్ కు ముడుపులు ఇచ్చిన వ్యవహారంలో ఆధారాలను ముందుంచి కవితను ఉక్కిరిబిక్కిరి చేస్తున్నారు.

దీంతో ఈ కేసులో కేజ్రీవాల్, కవిత ఈడి ఉచ్చులో చిక్కుకోవడం ఖాయం అన్న చర్చ జరుగుతుంది. ఢిల్లీ లిక్కర్ కుంభకోణంలో ఢిల్లీ సీఎం కేజ్రీవాల్ ని ప్రధాన కుట్రదారుగా నిరూపించడానికి కావలసిన అన్ని ఆధారాల సేకరణను ముమ్మరం చేసిన ఈడీ అధికారులు ఎమ్మెల్సీ కవితను 8వ రోజు విచారణలో భాగంగా ఊపిరాడని ప్రశ్నలతో ఉక్కిరి బిక్కిరి చేశారు.

ఢిల్లీ మద్యం విధానంలో లబ్ధి పొందిన వారి నుంచి కేజ్రీవాల్ నేరుగా ముడుపులను స్వీకరించిన అంశంపై ఆమెను గుచ్చి గుచ్చి ప్రశ్నించారు. ముడుపుల చెల్లింపు వ్యవహారంలో కేజ్రీవాల్, మనీష్ సిసోడియా తో కుదుర్చుకున్న ఒప్పందంలో భాగంగా సౌత్ గ్రూప్ సభ్యులతో కలిసి దళారుల ద్వారా ముడుపులు ఏ విధంగా చెల్లించారు అన్న అంశానికి సంబంధించిన కీలక సమాచారాన్ని ఆమె ముందు ఉంచి ప్రశ్నించినట్లు సమాచారం.

వివిధ మార్గాల ద్వారా కవిత పోషించిన పాత్రపై ఇతరులు ఇచ్చిన వాంగ్మూలాలను కూడా ఆమె ముందు పెట్టి విచారించినట్లు సమాచారం. కవితతో పాటు, ఈ లిక్కర్ కుంభకోణంలో మేక శరణ్ పాత్రపై కూడా ఈడి అధికారులు కవితను ప్రశ్నించినట్లు తెలుస్తోంది. కవిత నివాసంలో ఆమెను అరెస్ట్ చేసిన సమయంలో ఉన్న మేక శరణ్ ఫోన్ లో గుర్తించిన సౌత్ గ్రూప్ లావాదేవీల సమాచారం పై కూడా కవితను ప్రశ్నించినట్టు సమాచారం.

శరణ్ వ్యాపారాలు, ఆర్థిక లావాదేవీలపై కవితను పదేపదే ప్రశ్నిస్తున్నట్లు సమాచారం. అంతేకాదు ఈ కేసులో సమీర్ మహేంద్రు కీలక పాత్ర పోషించారని ఆయనను మరోమారు విచారణకు రావాలని సమన్లు జారీ చేశారు. సమీర్ మహేం ద్రు ఒక్కడినే విచారిస్తారా? లేకా ఈ కేసులో అప్రూవర్లుగా మారిన సౌత్ గ్రూప్ లోని కవిత మాజీ సీఏ బుచ్చిబాబు, మాగుంట రాఘవ, మాగుంట శ్రీనివాసులు తో కలిపి విచారిస్తారా అన్నది తెలియాల్సి ఉంది.

English summary

The ED officials who are questioning Kavita as Kejriwal's target in the Delhi liquor scam are suffocating Kavitha by presenting the evidence in the case of giving 100 crores money to Kejriwal.