తెల్లారితే కూతురు పెళ్లి.. తండ్రి మృతి.. పెళ్లింట తీవ్ర విషాదం!

సంతోషంగా పెళ్లి చేసి, కూతుర్ని అత్తగారింటికి పంపించాలని ఆశపడిన ఒక తండ్రి ఆశ తీరకుండానే వెళ్ళిపోయాడు. చిన్ననాడే తల్లి మృతి చెందగా, తండ్రి నీడలో పెరిగిన కుమార్తె తెల్లవారితే పెళ్లి జరుగుతుంది అనగా తండ్రి కూడా అనంత లోకాలకు వెళ్లిపోవడంతో తీరని దుఃఖసాగరంలో మునిగిపోయింది. విన్న ప్రతి ఒక్కరికి బాధ కలిగించిన ఈ సంఘటన వికారాబాద్ జిల్లాలో చోటుచేసుకుంది.

కూతురు పెళ్ళికి ముందు తండ్రి మృతితో విషాదం
వికారాబాద్ జిల్లా యాలాల మండలం సంగెంకుర్దు గ్రామంలో ఆండాల అనంతప్ప కుటుంబంలో చోటు చేసుకున్న విషాద ఘటన ఇది. వ్యవసాయమే జీవనాధారంగా జీవించే అనంతప్పకు భార్య శాఖమ్మ, ఒక కూతురు, కొడుకు. అయితే పది సంవత్సరాల క్రితం భార్య శాఖమ్మ చనిపోవడంతో లక్ష్మీ అనే మహిళను మళ్ళీ వివాహం చేసుకున్నాడు. ఆమెకు ఒక కొడుకు ఉన్నాడు.

కూతురి పెళ్లి కోసం ఘనంగా ఏర్పాట్లు
అనంతప్ప మొదటి భార్య శాఖమ్మ కుమార్తె అవంతికి పెళ్లి సంబంధం కుదిరింది. మొదటి భార్య కూతురు అవంతిని సొంతూరి కే చెందిన భరత్ కు ఇచ్చి పెళ్లి చేయడానికి అనంతప్ప నిర్ణయించాడు. నేడు పెళ్లి జరగాల్సి ఉండగా దీని కోసం అన్ని ఏర్పాట్లను పూర్తి చేశాడు. ఇంటికి రంగులు వేయించి, ఇంటి ముందు పందిరి వేసి, బంధువులందరినీ పిలిచి అంగ రంగ వైభవంగా పెళ్లి చేయాలని నిర్ణయించాడు.

బైక్ పై నుండి పడి అనంతప్పకు తీవ్ర గాయాలు
ఈ క్రమంలో ఇల్లంతా బంధువులతో సందడిగా మారింది. తెల్లవారితే పెళ్లి అనగా చిన్న చిన్న పనుల నిమిత్తం యాలాల మండల కేంద్రానికి వెళ్లి తిరిగి వస్తున్న క్రమంలో అనంతప్ప బైక్ అదుపుతప్పి కింద పడడంతో తలకు తీవ్ర గాయమైంది. దీంతో అపస్మారక స్థితిలోకి వెళ్ళిన ఆయనను తాండూర్ లోని జిల్లా ఆస్పత్రికి తరలించి ఆ తర్వాత మెరుగైన వైద్యం కోసం గాంధీ ఆస్పత్రికి తరలించారు.

చికిత్స పొందుతూ తండ్రి మృతి, పెళ్లికి బదులు ఆ ఇంట్లో చావు
చికిత్స పొందుతూ అనంతప్ప నేడు తెల్లవారుజామున తుది శ్వాస విడిచాడు. మరి కాసేపట్లో కూతురు పెళ్లి అనగా తండ్రి రోడ్డు ప్రమాదంలో మృతి చెందడం గ్రామస్తులు అందరినీ షాక్ కు గురి చేసింది. ఈ విషయం తెలిసిన గ్రామమంతా విషాదంలో మునిగిపోయింది. ఇక పెళ్లి కోసం వేసిన టెంట్ కిందే, పెళ్ళికి వచ్చిన బంధువులందరూ కన్నీరుమున్నీరు కాగా అనంతప్ప అంతిమ సంస్కారాలు చేయనున్నారు.

English summary

In Sangemkurdu village of Yalala mandal in Vikarabad district, Andala Anantappa died in a road accident when his daughter, whose wedding was to take place on sunday. This caused a tragedy in the village.