బిఆర్ఎస్ ఆత్మీయ సమ్మేళనంలో ఘోర ప్రమాదం; ఒకరు మృతి; పలువురికి తీవ్రగాయాలు

Updated: Wednesday, April 12, 2023, 13:44 [IST]

తెలంగాణ రాష్ట్ర వ్యాప్తంగా బిఆర్ఎస్ పార్టీ ఆత్మీయ సమ్మేళనాలు జరుగుతున్న విషయం తెలిసింది. అయితే తాజాగా బిఆర్ఎస్ ఆత్మీయ సమ్మేళనంలో ఘోర ప్రమాదం చోటుచేసుకుంది. ఖమ్మం జిల్లా కారేపల్లి బీఆర్ఎస్ ఆత్మీయ సమావేశంలో బాణాసంచా పేల్చడంతో, పేలిన బాణాసంచా నిప్పురవ్వలు ఒక గుడిసె పై పడి, గుడిసె దగ్ధమైంది. దీంతో భారీ పేలుడు సంభవించింది.ఖమ్మం జిల్లా ఏజెన్సీ చీమలపాడు ప్రాంతంలోని కారేపల్లి గ్రామంలో ఏర్పాటు చేసిన బీఆర్ఎస్ ఆత్మీయ సమ్మేళనం రక్తసిక్తంగా మారింది.

కారేపల్లి మండలం చీమలపాడులో టిఆర్ఎస్ ఆత్మీయ సమావేశం నిర్వహించగా భారీగా జన సమీకరణ చేశారు. ఈ కార్యక్రమానికి ముఖ్యనేతల రాక సందర్భంగా బీఆర్ఎస్ కార్యకర్తలు అత్యుత్సాహం ప్రదర్శించారు. ఎలాంటి జాగ్రత్త లేకుండా బాణాసంచా కాల్చారు. బాణాసంచా నిప్పురవ్వలు పడి పక్కనే వంటలు చేస్తున్న పూరి గుడిసె దగ్ధం కావడంతో ఈ పెను ప్రమాదం చోటుచేసుకుంది.

బాణాసంచా పేలుడు తో గుడిసె దగ్ధం కాగా, గుడిసెలో ఉన్న గ్యాస్ సిలిండర్ పేలుడు ధాటికి విధులు నిర్వహిస్తున్న సిఐతో సహా పదిమంది కాళ్లు చేతులు తెగిపడ్డాయి. గాయపడిన వారిలో పోలీసులు, జర్నలిస్టులు, బి ఆర్ ఎస్ కార్యకర్తలు ఉన్నారు. అయితే గుడిసెకు అంటుకున్న మంటలతో, గుడిసెలో ఉన్న గ్యాస్ సిలిండర్ ఒకసారిగా పేలినట్టు తెలుస్తుంది. దీంతో అక్కడ భయానక వాతావరణం చోటు చేసుకుంది. క్షతగాత్రుల ఆక్రందనలతో అక్కడ భయానక వాతావరణం చోటు చేసుకుంది.

అగ్నిప్రమాద ఘటనలో మహారాష్ట్రకు చెందిన వలసకూలీ సందీప్ మృతి చెందినట్టుగా గుర్తించారు. అగ్నిప్రమాద ఘటనలో 10 మందికి గాయాలు కాగా, వారిలో 8 మందికి తీవ్ర గాయాలు అయ్యాయి. పలువురి కాళ్ళు, చేతులు అగ్నిప్రమాద దాటికి నుజ్జు నుజ్జు కావడంతో గ్రామంలో బీతావహ పరిస్థితి నెలకొంది. ఈ కార్యక్రమానికి హాజరు కావడానికి ఎంపీ నామా నాగేశ్వరరావు, ఎమ్మెల్యే రాములు అక్కడికి వచ్చారు. అగ్ని ప్రమాదం నేపథ్యంలో బీఆర్ఎస్ ఆత్మీయ సమ్మేళనాన్ని నిలిపివేసిన నేతలు సహాయక చర్యలో పాల్గొంటున్నారు. క్షతగాత్రులను ఆసుపత్రికి తరలిస్తున్నారు. స్థానికులు పోలీసుల సహకారంతో మంటలను ఆర్పుతున్నారు.