గోదావరి ఉగ్రరూపం: భారీ వర్షాలతో ఈ జిల్లాలకు వరద ముప్పు

తెలంగాణ, మహారాష్ట్ర, ఛత్తీస్ గఢ్‌లలో కురుస్తున్న భారీ వర్షాల కారణంగా గోదావరి నదికి వరద పోటెత్తింది. దీంతో శ్రీరాంసాగర్ ప్రాజెక్టు, శ్రీపాద ఎల్లంపల్లి ప్రాజెక్ట్, మేడిగడ్డ బ్యారేజీ వంటి ప్రధాన ప్రాజెక్టులు భారీ ప్రవాహాన్ని ఎదుర్కొంటున్నాయి. ఈ పరిస్థితి కారణంగా ఆదిలాబాద్, నిర్మల్ సహా అనేక జిల్లాల్లో వరద ముప్పు పెరిగింది. లోతట్టు ప్రాంతాలు జలమయం అవుతుండగా.. అనేక గ్రామాల మధ్య రాకపోకలు నిలిచిపోయాయి. పంట పొలాలు మునిగిపోయాయి. దీంతో అధికారులు అప్రమత్తంగా ఉన్నారు.

ప్రధాన ప్రాజెక్టుల ప్రస్తుత పరిస్థితి
శ్రీరాంసాగర్ ప్రాజెక్ట్ (SRSP): ఈ ప్రాజెక్టులోకి ఆగస్టు 29, 2025 నాటికి 4, 30, 000 క్యూసెక్కుల ప్రవాహం వస్తోంది. ప్రాజెక్టు పూర్తిస్థాయి నీటిమట్టం (1091 అడుగులు)కి చేరువలో ఉండటంతో, అధికారులు భారీగా వరద నీటిని దిగువకు విడుదల చేస్తున్నారు. ఆగస్టు 27న కూడా ఎస్సారెస్పీ నుంచి 2,50,000 క్యూసెక్కుల నీటిని విడుదల చేశారు.

శ్రీపాద ఎల్లంపల్లి ప్రాజెక్ట్: ఈ ప్రాజెక్టులోకి కూడా భారీగా నీరు వస్తోంది. ప్రస్తుతం నీటిమట్టం 145.08 మీటర్లు (పూర్తి స్థాయి 148 మీటర్లు)గా ఉంది. దీనిలోకి ఎస్సారెస్పీ నుంచి 4,53,245 క్యూసెక్కులు, కడెం ప్రాజెక్టు నుంచి 27,648 క్యూసెక్కులు, దాని పరివాహక ప్రాంతం నుంచి 2,02,135 క్యూసెక్కులతో మొత్తం 6,83,028 క్యూసెక్కుల ప్రవాహం ఉంది. అధికారులు 62 గేట్లలో 38 గేట్లను తెరిచి, 6,76,834 క్యూసెక్కుల నీటిని దిగువకు వదులుతున్నారు.

గడ్డెన్న వాగు ప్రాజెక్ట్: నిర్మల్ జిల్లాలోని ఈ ప్రాజెక్ట్ దాదాపు నిండిపోయింది. ఒకే రోజు నిర్మల్ జిల్లాలో 33 సెం.మీ. వర్షపాతం నమోదు కావడంతో భారీగా వరద వస్తోంది. అధికారులు మూడు క్రస్ట్ గేట్లను తెరిచి 20,500 క్యూసెక్కుల నీటిని విడుదల చేస్తున్నారు.

కోతకు గురైన రోడ్లు.. ముంపునకు గురైన గ్రామాలు
బంగాళాఖాతంలో ఏర్పడిన అల్పపీడనం కారణంగా కురుస్తున్న వర్షాలు నిర్మల్, ఆదిలాబాద్ జిల్లాల్లో తీవ్ర అంతరాయం కలిగించాయి. నిర్మల్ నుంచి ఆదిలాబాద్ వెళ్లే పాత జాతీయ రహదారి సహా అనేక రోడ్లు కొట్టుకుపోయాయి. బాసర, సారంగాపూర్, సోన్ మండలాల్లో రవాణా నిలిచిపోయింది. స్వర్ణ వాగు వంటి వాగులు పొంగిపొర్లడంతో బిడ్రెల్లి, జామ్, మాధాపూర్ వంటి గ్రామాలతో సంబంధాలు తెగిపోయాయి. గోదావరి, దాని ఉపనదుల వెంట ఉన్న పంట పొలాలు మునిగిపోయాయి. భారీగా పంట నష్టం వాటిల్లిందని తెలుస్తోంది. పంటలు మునిగిపోవడంతో రైతులు దిక్కుతోచని స్థితిలో అయోమయంలో పడిపోయారు.

కాళేశ్వరం వద్ద ప్రమాద హెచ్చరికలు జారీ
కాళేశ్వరం వద్ద గోదావరి ఉగ్రరూపంతో ప్రవహిస్తోంది. పుష్కర ఘాట్ వద్ద నీటిమట్టం 12.50 మీటర్లకు చేరుకుంది. ఇది మొదటి ప్రమాద హెచ్చరిక స్థాయి (12.210 మీటర్లు)ని దాటి, ప్రమాద స్థాయి (13.46 మీటర్లు)కి చేరువలో ఉంది. అధికారులు అప్రమత్తమై వరద హెచ్చరికలు జారీ చేశారు. నదిలోకి నీరు పోటెత్తడంతో పుష్కర ఘాట్లు, ప్రైవేట్ లాడ్జిలు, వ్యవసాయ భూములు నీటమునిగాయి.

మేడిగడ్డ బ్యారేజీ వద్ద కూడా భారీ ప్రవాహం కొనసాగుతోంది. ఇన్‌ఫ్లో, ఔట్ ఫ్లో 9,71,880 క్యూసెక్కులుగా ఉంది. బ్యారేజీ పూర్తి స్థాయి నీటిమట్టం 100 మీటర్లకు దగ్గరగా ఉండటంతో, మొత్తం 85 గేట్లను తెరిచి నీటిని విడుదల చేస్తున్నారు. మంజీరా నది కూడా ఉప్పొంగి ప్రవహిస్తోంది, దీంతో నిజామాబాద్, కామారెడ్డి, మెదక్, సంగారెడ్డి జిల్లాల్లో వరద ముప్పు పెరిగింది. నిజాం సాగర్ ప్రాజెక్టులోకి 54,200 క్యూసెక్కుల ప్రవాహం వస్తుండగా, 43,286 క్యూసెక్కుల నీటిని విడుదల చేస్తున్నారు. దీంతో బోధన్ మండలం ఖండగం, హంగర్గా వంటి గ్రామాలు ముంపునకు గురయ్యే ప్రమాదం ఉంది.

భద్రాద్రి కొత్తగూడెం, ఆదిలాబాద్, నిర్మల్ జిల్లాల్లోని అధికారులు హై అలర్ట్‌లో ఉన్నారు. సహాయక శిబిరాలను ఏర్పాటు చేసి, ప్రజలకు సహాయం అందిస్తున్నారు. ఎగువ ప్రాంతాల నుంచి ప్రాణహిత, ఇంద్రావతి, తాళిపేరు వంటి ఉపనదుల నుంచి ప్రవాహం పెరిగే అవకాశం ఉండటంతో అధికారులు పరిస్థితిని నిశితంగా పర్యవేక్షిస్తున్నారు.

English summary

Due to heavy rains in Telangana, Maharashtra, and Chhattisgarh, the Godavari river is swelling. SRSP, Sripada Yellampalli, Medigadda projects are facing heavy inflows.