తెలుగువారి ఆత్మగౌరవ ప్రతీక ఎన్టీఆర్; కారణజన్ముడు: మెగా బ్రదర్స్ చిరంజీవి, పవన్ కళ్యాణ్!!

ఎన్టీఆర్ శతజయంతి సందర్భంగా తెలుగు రాష్ట్రాల్లోని సినీ ప్రముఖులు, రాజకీయ రంగ ప్రముఖులు నటసార్వభౌమ ఎన్టీ రామారావు ను స్మరించుకుంటున్నారు. హైదరాబాద్లోని ఎన్టీఆర్ ఘాట్ వద్ద ప్రముఖులు పుష్పాంజలి ఘటించి నివాళులర్పిస్తున్నారు. ఎన్టీఆర్ జయంతి సందర్భంగా మెగాస్టార్ చిరంజీవి ఆ మహనీయుని స్మరించుకుంటూ సోషల్ మీడియా వేదికగా ట్వీట్ చేశారు.

నూటికో కోటికో ఒక్కరు.. వందేళ్లు కాదు.. చిరకాలం మన మనసులో మిగిలిపోతారు అంటూ మెగాస్టార్ చిరంజీవి ట్వీట్ చేశారు. చరిత్ర వారి గురించి భావితరాలకు గర్వంగా చెబుతుందని పేర్కొన్నారు. ఎన్టీఆర్ అటువంటి కారణజన్ముడని కొనియాడారు. తెలుగు జాతి ఘన కీర్తి కి వన్నెతెచ్చిన నందమూరి తారక రామారావు తో నా అనుబంధం నాకెప్పుడూ చిరస్మరణీయం అంటూ ఎన్టీఆర్ శతజయంతి సందర్భంగా మెగాస్టార్ చిరంజీవి ఆయనను స్మరించుకున్నారు.

ఎన్టీఆర్ శతజయంతి సందర్భంగా జనసేన పార్టీ అధినేత పవన్ కళ్యాణ్ ఎన్టీఆర్ కు అంజలి ఘటించారు. ఈ మేరకు ప్రకటన విడుదల చేసిన పవన్ కళ్యాణ్ తెలుగువారి ఆత్మ గౌరవానికి ప్రతీక ఎన్టీఆర్ అంటూ కొనియాడారు. చరిత మరువని నటనాకౌశలం, తెలుగు నుడికారం పై మమకారం, పార్టీని స్థాపించిన 8 నెలల్లోనే అధికారం కైవసం అంటూ ఎన్టీఆర్ సాధించిన ఘనతను చెప్పుకొచ్చారు.

నూటికో కోటికో ఒక్కరు... వందేళ్లు కాదు...చిరకాలం, కలకాలం మన మనస్సులో మిగిలిపోతారు. చరిత్ర వారి గురించి భావితరాల కి గర్వంగా చెబుతుంది.
అలాంటి కారణ జన్ముడు శ్రీ NTR.
తెలుగు జాతి ఘనకీర్తి కి వన్నె తెచ్చిన శ్రీ నందమూరి తారక రామారావు గారితో నా అనుబంధం నాకెప్పుడూ చిరస్మరణీయం.…

— Chiranjeevi Konidela (@KChiruTweets) May 28, 2023

ఇలా మాట్లాడుతూ ఉంటే మనందరికీ స్పురణకు వచ్చే ఒకే ఒక్క పేరు నందమూరి తారక రామారావు అని పవన్ కళ్యాణ్ తెలిపారు. ఉమ్మడి ఆంధ్రప్రదేశ్ ముఖ్యమంత్రిగా ఆయన ప్రారంభించిన రెండు రూపాయలకే కిలో బియ్యం పథకం ఎంతో మేలైనది, అందరికీ అనుసరణీయం అయినదని పవన్ కళ్యాణ్ పేర్కొన్నారు .

తెలుగువారి ఆత్మ గౌరవానికి ప్రతీక శ్రీ ఎన్.టి.ఆర్. - JanaSena Chief Shri @PawanKalyan #100YearsOfNTR #NTRJayanti pic.twitter.com/43DXD4qKeX

— JanaSena Party (@JanaSenaParty) May 28, 2023

నాటి ఢిల్లీ పాలకులు తెలుగు జాతి ఖ్యాతి ని గుర్తించని సమయంలో తెలుగువారి ఆత్మగౌరవం నినాదంతో ఎన్నికలలో అజేయమైన విజయం అందుకుని తెలుగువారి సత్తా ఢిల్లీ దాకా చాటారని అన్నారు. సినీ రంగంలోనూ, రాజకీయరంగంలోనూ తనదైన ముద్ర వేసిన ఎన్టీఆర్ తెలుగు బిడ్డగా జన్మించడం తెలుగువారందరికీ గర్వకారణం అని పవన్ కళ్యాణ్ పేర్కొన్నారు. ఈ పుణ్య దినాన మహనీయునికి నా తరపున, జనసేన శ్రేణుల తరపున నీరాజనాలు అర్పిస్తున్నానని జనసేన అధినేత పవన్ కళ్యాణ్ పేర్కొన్నారు.

English summary

On the occasion of NTR's centenary, Megastar Chiranjeevi said that NTR was born for a cause. Pawan Kalyan said that NTR is a symbol of Telugu people's self-respect.