రూ.232.7కోట్లతో హైదరాబాద్‌కు ప్రపంచస్థాయి సైన్స్ ఎక్స్‌పీరియన్స్ సెంటర్!
హైదరాబాద్ నగరం త్వరలో మరో ప్రత్యేక ఆకర్షణను సొంతం చేసుకోనుంది. తార్నాకలోని సీఎస్‌ఐఆర్-ఇండియన్ ఇన్‌స్టిట్యూట్ ఆఫ్ కెమికల్ టెక్నాలజీ ప్రాంగణంలో రూ.232.7 కోట్ల వ్యయంతో ప్రపంచస్థాయి సైన్స్ ఎక్స్‌పీరియన్స్ సెంటర్ నిర్మాణం జరుగుతోంది. ఈ కేంద్రం నగరానికి కొత్త గుర్తింపు తెచ్చి, విద్యార్థుల్లో శాస్త్రీయ దృక్పథాన్ని పెంపొందించడంలో కీలక పాత్ర పోషించనుందని కేంద్ర మంత్రి కిషన్ రెడ్డి తెలిపారు.
గురువారం తన ఎక్స్ ఖాతాలో నిర్మాణంలో ఉన్న సెంటర్ నమూనా చిత్రాలను పోస్ట్ చేస్తూ ఆయన వివరాలు పంచుకున్నారు. కేంద్ర సాంస్కృతిక మంత్రిత్వ శాఖ ఆధ్వర్యంలో నేషనల్ కౌన్సిల్ ఆఫ్ సైన్స్ మ్యూజియమ్స్ ఈ ప్రాజెక్టును అమలు చేస్తోంది. 2027 మే-జూన్ నాటికి పూర్తి కావాలని అధికారులు లక్ష్యంగా పెట్టుకున్నారు. ఇప్పటికే ఎంట్రీ కాంప్లెక్స్ నిర్మాణం ముందుకు సాగుతోంది. ప్రధాన భవనం ప్లింత్ పనులు కూడా దాదాపు పూర్తయ్యాయి.
ఈ సెంటర్‌లో అనేక ఆకర్షణలు ఉంటాయి. ఇంటరాక్టివ్, ఇమ్మర్సివ్ ప్రదర్శనలు, ఖగోళ వింతలు, అంతరిక్ష అద్భుతాలు, రోబోటిక్స్, ఆవిష్కరణల హబ్‌లు ప్రధాన ఆకర్షణలు. 3డీ డిజిటల్ డోమ్ థియేటర్‌లో అంతరిక్ష ప్రయాణం అనుభూతి, వాక్-త్రూ ఆక్వేరియం ద్వారా సముద్ర జీవుల ప్రపంచం, మోషన్ సిమ్యులేటర్‌తో భౌతిక శాస్త్ర సూత్రాలు అనుభవపూర్వకంగా తెలుసుకోవచ్చు.
ఫన్ సైన్స్ గ్యాలరీలో భౌతిక శాస్త్రం, రసాయన శాస్త్రం, గణితం, ఆప్టికల్ ఇల్యూజన్లపై చేతితో తాకి నేర్చుకునే అవకాశం ఉంటుంది. విద్యార్థుల కోసం ప్రత్యేక యాక్టివిటీ జోన్లు, ఇన్నోవేషన్ హబ్‌లు కూడా ఏర్పాటు చేస్తున్నారు. ఇది కేవలం ఒక ప్రదర్శన కేంద్రం మాత్రమే కాదు. వికసిత్ భారత్ లక్ష్యం దిశగా యువతలో జిజ్ఞాస, ఆవిష్కరణ స్ఫూర్తిని పెంచే కేంద్రం అని కిషన్ రెడ్డి చెప్పారు.
సాంప్రదాయ భారతీయ జ్ఞాన వ్యవస్థలను ఆధునిక శాస్త్రంతో కలిపి చూపించాలని కూడా లక్ష్యంగా పెట్టుకున్నారు. హైదరాబాద్‌లో ఇప్పటికే ఐఐసీటీ, ఎన్‌జీఆర్‌ఐ వంటి ప్రముఖ పరిశోధన సంస్థలు ఉన్నాయి. ఈ కొత్త సెంటర్ ఆ శాస్త్రీయ వాతావరణాన్ని మరింత బలోపేతం చేస్తుంది. పిల్లలు పుస్తకాల్లోనే కాకుండా ప్రత్యక్ష అనుభవంతో సైన్స్ నేర్చుకోవడం వల్ల వారిలో ఆసక్తి పెరుగుతుంది. భవిష్యత్తులో శాస్త్రవేత్తలు, ఇంజనీర్లు, ఆవిష్కర్తలు తయారవ్వడానికి ఇది బలమైన పునాది వేస్తుంది.
నగర పర్యాటక రంగానికి కూడా ఇది కొత్త ఆకర్షణగా మారనుంది. కుటుంబాలు, స్కూల్ గ్రూపులు, కళాశాల విద్యార్థులు ఇక్కడకు వచ్చి ఒకేసారి అనేక శాస్త్ర విభాగాలను అనుభవించవచ్చు. హైదరాబాద్‌ను దేశంలోనే సైన్స్, ఇన్నోవేషన్ హబ్‌గా నిలబెట్టే దిశగా ఇది ముఖ్యమైన అడుగు. నిర్మాణ పనులు వేగంగా సాగుతున్న నేపథ్యంలో 2027లో ప్రజలకు అందుబాటులోకి రావాలని అంచనా. ఈ కేంద్రం పూర్తయితే తెలంగాణ యువతకు, దేశ విద్యార్థులకు ఒక గొప్ప అవకాశం లభిస్తుంది.
Click it and Unblock the Notifications
Sign in with Google
