దుబ్బాక బీఆర్ఎస్ అభ్యర్థి కొత్త ప్రభాకర్ రెడ్డిపై కత్తితో దాడి; అసలేం జరిగిందంటే!!

తెలంగాణ రాష్ట్రంలో ఎన్నికల హడావిడి కొనసాగుతుంది. అధికార ప్రతిపక్ష పార్టీలు ఒకరిని మించి ఒకరు దూకుడుగా ఎన్నికల వ్యూహాలతో ముందుకు వెళుతున్నారు. ఈసారి అన్ని ప్రధాన పార్టీలు అమీతుమీ తేల్చుకోవటానికి రెడీ కావడంతో రాజకీయాలు రసవత్తరంగా మారాయి. అయితే ఎన్నికల ప్రచారం నిర్వహిస్తున్న వారిపై ఊహించని విధంగా దాడులు కూడా కొనసాగుతున్నాయి.

తాజాగా మెదక్ పార్లమెంటు సభ్యుడు, దుబ్బాక బీఆర్ఎస్ ఎమ్మెల్యే అభ్యర్థి కొత్త ప్రభాకర్ రెడ్డిపై ఒక వ్యక్తి కత్తితో దాడి చేశాడు. దౌలతాబాద్ మండలం సూరంపల్లి లో కొత్త ప్రభాకర్ రెడ్డి ఎన్నికల ప్రచారాన్ని నిర్వహిస్తున్నాడు. బీఆర్ఎస్ పార్టీ అభ్యర్థిగా తనను గెలిపించాలని గ్రామంలో ప్రచారం నిర్వహిస్తున్నారు. ఈ క్రమంలో రాజు అనే వ్యక్తి హఠాత్తుగా దూసుకు వచ్చి ఊహించని విధంగా ఆయన కడుపుపై కత్తితో దాడి చేశాడు.

ఈ ఘటనలో కొత్త ప్రభాకర్ రెడ్డి కి గాయాలయ్యాయి. అక్కడే ఉన్న బీఆర్ఎస్ కార్యకర్తలు ఎమ్మెల్యే అభ్యర్థిపై దాడితో షాక్ కు గురయ్యారు. ఆపై వెంటనే తేరుకుని ఒక్కసారిగా దాడి చేసిన రాజును పట్టుకుని చితకబాదారు. అతన్ని అనంతరం పోలీసులకు అప్పగించారు. ప్రస్తుతం నిందితుడు పోలీసుల అదుపులో ఉన్నాడు.

అయితే కొత్త ప్రభాకర్ రెడ్డి పై రాజు ఎందుకు దాడి చేశాడు. అసలు రాజు ఎవరు అనే కోణంలో పోలీసులు దర్యాప్తు చేస్తున్నారు. మరోవైపు దాడి అనంతరం కడుపు భాగంలో గాయమైన కొత్త ప్రభాకర్ రెడ్డిని ఆయన వాహనంలోనే ఆసుపత్రికి తరలించారు. మొదటి గజ్వేల్ కు తరలించి అక్కడ ప్రాథమిక చికిత్స అందించి, అనంతరం కొత్త ప్రభాకర్ రెడ్డిని హైదరాబాద్ కు తరలించారు.

Unknown person attack #BRS sitting MP Kotha Prabhakar Reddy with a knife
During the election campaign he was attacked in Doulthabad Mandal of #Siddipet

BRS MP was rushed to the hospital after he received injuries #Telangana #TelanganaAssemblyElections2023 pic.twitter.com/G9AB4oMUXn

— Aneri Shah (@tweet_aneri) October 30, 2023

అయితే కొత్త ప్రభాకర్ రెడ్డి పై జరిగిన దాడి ప్రతిపక్షాల ప్రమేయంతో జరిగిన దాడినా, లేకా రాజు వ్యక్తిగతంగా చేసిన దాడినా అనేది తెలియాల్సి ఉంది. ఏది ఏమైనా దుబ్బాకలో ఈ వ్యవహారం ఇప్పుడు హాట్ టాపిక్ గా మారింది.

English summary

Dubbaka BRS candidate Kotha Prabhakar Reddy was attacked by a man named Raju with a knife in election campaign. Kotha Prabhakar Reddy, who was injured in this attack, was rushed to the hospital.