రేప్: అవమానంతో ఆత్మహత్య చేసుకున్న అమ్మాయి

By Pratap

Published: Tuesday, August 28, 2012, 13:12 [IST]

Raped by neighbour, girl commits suicide

జైసల్మీర్: తనపై అత్యాచారం జరిగిన సంఘటనను తట్టుకోలేక, అవమానాలు భరించలేక 16 ఏళ్ల అమ్మాయి బావిలో దూకి ఆత్మహత్య చేసుకుంది. ఈ సంఘటన అదివారంనాడు రాజస్థాన్‌లోని బర్మేర్ జిల్లా భఖాసర్ గ్రామంలో జరిగింది. పని కోసం సమీపంలోని అడవిలోకి వెళ్లిన బాలికపై పొరుగునే ఉండే మొహమ్మద్ హుస్సేన్ అనే వ్యక్తి అత్యాచారం చేసినట్లు పోలీసులు తెలిపారు.

అడవిలో ఒంటరిగా ఉన్న అమ్మాయిని నిర్మానుష్యమైన ప్రదేశానికి తీసుకుని వెళ్లి హుస్సేనే ఆమెపై అత్యాచారం జరిపాడు. అమ్మాయిని అక్కడే వదిలేసి అతను పారిపోయాడు. ఆదివారం రాత్రి ఆ బాలిక బావిలో దూకినప్పుడు తాము చూసినట్లు గ్రామస్థులు చెబుతున్నారు.

రేప్ జరిగిన తర్వాత అమ్మాయిని అవమానాలకు గురిచేసి ఉంటారని, దానివల్లనే ఆమె ఆత్మహత్య చేసుకుని ఉంటుందని పోలీసులు అనుమానిస్తున్నారు. కుటుంబ సభ్యులు కూడా బావి దగ్గరకు చేరుకున్నారు. ఆ తర్వాత ఆమె శవాన్ని బావిలోంచి తీశారు.

నిందితుడిపై తాము కేసు నమోదు చేశామని, అతను పరారీలో ఉన్నాడని పోలీసులు చెప్పారు. పోస్టుమార్టం తర్వాత అమ్మాయి శవాన్ని కుటుంబ సభ్యులకు అప్పగించినట్లు పోలీసులు తెలిపారు.

Published On August 28, 2012