కవిత: ఐనా నేనెగుస్తాను

వక్రీకరించిన నీ కఠోరమైన అబద్దాలతో
నువ్వు నన్ను చరిత్రలో పాతరేస్తేనేమి
ఆ రొంపిలోనే నువ్వు నన్ను
నీ పాదాలకింద నలిపివేస్తేనేమి
ఆ ధూళిలోనుంచే నేనెగుస్తాను

వెటకారాల నా దురుసుతనం

నిన్నొక క్లేశ మతిని చేస్తున్నదా

నిన్ను విషాదమేదో ఆవహించినట్లున్నదేమి

నా విశ్రమ నివాసంలోనుంచి వెల్లువెత్తుతున్న

చమురు బావులేవో నాలో నిక్షిప్తమైనట్లు

నేను నడుస్తుంటాను కనుకనా

చందమామలవలె సూర్యబింబాలవలె
నింగికెగిసే ఆశలవలె
అదుపులేని కడలి తరగలవలె
నేనెగుస్తాను

నువ్వు నన్నొక తలవొగ్గిన
కండ్లు నేలకు వాల్చిన
దుఃఖితగా చూడాలనుకొంటివా
అథొముఖంగా జారిపడుతున్న
కన్నీళ్ళ బిందువులవలె
నా భుజాలు కృంగిపోతున్న నన్ను
నువ్వొక దుఃఖితగా చూడాలనుకొంటివా
నువ్వు నన్నొక
గుండెలోతులనుంచి ఉబికిన ఆక్రందనల్లో
శక్తి హీనమైన
దుఃఖితగా చూడాలనుకొంటివా

పొగరెక్కిన నా గడుసుతనం
నిన్ను భంగపరుస్తున్నదా
నా యింటి పెరటి లోపల ఏవో
బంగారు గనుల తవ్వకాలున్నట్లు నేను
పగలబడి నవ్వుతాను కనుక నీకదొక
కొరకుడుపడని కొయ్య అనిపించవొచ్చు

నువ్వు నన్ను నీ వెకిలి మాటలతో
గాయపరిస్తేనేమి
నీ చూపులతో నువ్వు నన్ను
ఖండఖండాలుగా నరికివేస్తేనేమి

నీ ద్వేషాగ్నితో నువ్వు నన్ను
హతమారిస్తేనేమి
వీచే గాలిలో నేనెగుస్తాను

నా ప్రాయపు ఆడతనం
నిన్నొక వికృత మతిని చేస్తున్నదా
నా తొడలు రొండేకమయే చోట
వజ్రాల సంపదొకటి గుప్తమై వున్నట్లు
నేనాడుతుండడం నీకొక
ఆశ్చర్యార్థకమవుతున్నదా

తలవంపుల చరిత్ర కుటీరాలనుంచి
నేనెగుస్తాను
వ్యధల్లొ నిగూఢమైవున్న గతంలోనుంచి
నేనెగుస్తాను

కదం తొక్కుతూ విశాలంగా పరుచుకొస్తున్న
నేనొక నల్ల సముద్రాన్ని
ఎగజిమ్మిన వెల్లువైన
నేనొక ఉప్పెనకు గర్భస్థాన్ని

భయానకమైన కాళరాత్రుల మీదినుంచి
ఒకానొక ముగ్ధమనోహర ఉదయాకాశంలోనికి
నేనెగుస్తాను

నా తరాల వారసత్వం నాకందిచ్చిన
కానుకల్ని వెంటమోసుకొని వొస్తున్న నేనొక
బానిసత్వం కలలుగన్న స్వప్నాన్ని
నేనొక బానిసత్వం ఆశపడ్డ స్వప్నాన్ని

ఇంగ్లీషు మూలం: మాయా ఏంజెలో రచన Still I Rise
అనువాదం: బైరెడ్డి కృష్ణారెడ్డి
[email protected]

మొబైల్: 9440072211

English summary

A prominent poet in Telugu Baireddy Krishna Reddy has translated Still I Rise poem into Telugu.