Asian Games 2026: భారత్ ఘనవిజయం.. నేటి షెడ్యూల్ ఇదే!

Asian Games 2026: జపాన్‌లోని ఐచి-నగోయాలో జరుగుతున్న 20వ ఆసియా క్రీడల్లో భారత మహిళల హాకీ జట్టు అద్భుతంగా తమ ప్రయాణాన్ని ప్రారంభించింది. సలీమా టెటే సారథ్యంలోని భారత జట్టు తమ తొలి మ్యాచ్‌లోనే బలహీనమైన ఉజ్బెకిస్తాన్‌ను 19-0 తేడాతో చిత్తు చేసి ఏకపక్ష విజయాన్ని నమోదు చేసింది. 60 నిమిషాల పాటు ఆటలో భారత్ ఆధిపత్యం ఎంతగా ఉందంటే.. రక్షణాత్మకంగా ఆడటం తప్ప ఉజ్బెకిస్తాన్ జట్టు ఒక్క ఎదురుదాడి కూడా చేయడంలో పూర్తిగా విఫలమైంది. ఈ మ్యాచ్‌లో భారత్ తరఫున యువ డ్రాగ్-ఫ్లిక్కర్ దీపికా సెహ్రావత్ అతిపెద్ద స్టార్‌గా నిలిచింది. ఆమె ఒక్కతే 8 గోల్స్ చేసి ఆసియా క్రీడల చరిత్రలో ఒకే మ్యాచ్‌లో అత్యధిక వ్యక్తిగత గోల్స్ చేసిన రికార్డును సృష్టించింది.

తొలి నిమిషం నుంచే ఆధిపత్యం
మ్యాచ్ ప్రారంభం నుంచే భారత జట్టు ఉజ్బెకిస్తాన్‌పై పట్టు బిగించింది. లాల్‌రెమ్సియామి తన కెరీర్‌లో 48వ అంతర్జాతీయ గోల్‌తో భారత్ తరఫున తొలి గోల్ చేసింది. ఆ తర్వాత దీపిక తన తొలి ఆసియా గేమ్స్ గోల్ సాధించగా.. ఇషిక, బల్జీత్ రీబౌండ్‌లు జోడించి తొలి క్వార్టర్‌లో భారత్‌కు 4-0 ఆధిక్యాన్ని అందించారు. రెండో క్వార్టర్‌లో నేహా గోయల్ బ్యాక్‌హ్యాండ్ షాట్‌తో భారత్‌కు ఐదో గోల్ అందించింది. ఆరంభంలో లభించిన పెనాల్టీ కార్నర్‌లను కోల్పోయిన దీపిక వరుసగా అద్భుతమైన డ్రాగ్-ఫ్లిక్‌లు, రీబౌండ్‌లతో తన హ్యాట్రిక్‌ను పూర్తి చేసింది. రితుజ కూడా తన వంతు సహకారం అందించడంతో, విరామ సమయానికి భారత్ 8-0 ఆధిక్యంలో నిలిచింది. విరామానికి కేవలం ఒక నిమిషం ముందు సీనియర్ క్రీడాకారిణి నేహా గోయల్‌కు గ్రీన్ కార్డ్ లభించింది.

దీపిక చారిత్రాత్మక రికార్డు.. గోల్స్ వర్షం
విరామం తర్వాత భారత జట్టు తమ దూకుడును పెంచింది. భారత్ చేసిన 9వ గోల్‌ను ఉజ్బెకిస్తాన్ డీఆర్ఎస్ ద్వారా రద్దు చేసింది. కానీ ఆ తర్వాత దీపిక పెనాల్టీ కార్నర్‌లకు ఉజ్బెకిస్తాన్ వద్ద సమాధానం లేకుండా పోయింది. దీపిక వెంటవెంటనే మరో నాలుగు గోల్స్ చేసింది. ఈలోగా ఇషిక తన రెండో గోల్ చేయగా, లాల్‌థంతులంగి, సాక్షి, నవనీత్ కూడా స్కోరు పట్టికలో తమ వంతు చేర్చడంతో, స్కోరు 16-0కి చేరింది. నాల్గవ క్వార్టర్‌లో, లాల్‌థంతులంగి పెనాల్టీ స్ట్రోక్‌ను గోల్‌గా మార్చగా, ఇషిక ఓ అద్భుతమైన ఫీల్డ్ గోల్‌తో తన హ్యాట్రిక్‌ను పూర్తి చేసింది. ఆ తర్వాత దీపిక మ్యాచ్‌లో తన 8వ గోల్ చేసి ఆసియా క్రీడల చరిత్రలో సరికొత్త ఆల్-టైమ్ రికార్డును నెలకొల్పింది.

చారిత్రాత్మక విజయం
ఈ ఏకపక్ష మ్యాచ్‌లో భారత్‌కు అతిపెద్ద ఊరట ఏమిటంటే.. జట్టులోని క్రీడాకారిణుల సంఖ్య. ఇందులో 8 మంది విభిన్న క్రీడాకారిణులు (దీపిక-8, ఇషిక-3, లల్‌థంథ్లువాంగి-2, లాల్‌రెమ్సియామి-1, బల్జిత్-1, నేహా-1, రితుజ-1, నవనీత్-1, సాక్షి-1) గోల్స్ సాధించారు. 1982లో హాంకాంగ్‌పై 22-0 తేడాతో గెలిచి ఆసియా క్రీడల్లో అత్యధిక తేడాతో గెలిచిన రికార్డును నెలకొల్పిన భారత్.. ఆ రికార్డుకు కేవలం 3 గోల్స్ దూరంలో నిలిచిపోయినప్పటికీ, ఈ 19-0 విజయం భారత మహిళల హాకీ జట్టు సంకల్పాన్ని స్పష్టం చేయడానికి సరిపోతుంది.

నేటి షెడ్యూల్ వివరాలు ఇలా!
2026 ఆసియా క్రీడల్లో భాగంగా రెండో రోజున భారత్‌కు రెండు పతకాలు గెలుచుకునే అవకాశం ఉంది. టె‌క్‌బాల్‌లోని మిక్స్‌డ్ డబుల్స్, మహిళల సింగిల్స్ ఈవెంట్లలో క్విన్సీ డిసౌజా కాంస్యం గెలుచుకునే అవకాశం ఉంది. ఒకవేళ ఇది జరిగితే భారత్ కు ఇదే తొలి పతకం అవుతుంది.అంతేకాకుండా మహిళల క్రికెట్ జట్టు ఫైనల్‌కు చేరుకుంటే పతకం ఖాయమవుతుంది. షూటింగ్ జట్టు కూడా తమ పోటీలను ప్రారంభించనుంది. సెప్టెంబర్ 20న జరిగే 2026 ఆసియా క్రీడల్లో భారత అథ్లెట్ల పూర్తి షెడ్యూల్ వివరాలు తెలుసుకుందాం.

ఆసియా క్రీడల కోసం నేటి భారత షెడ్యూల్
*ఉదయం 5:10 - మిక్స్డ్ మార్షల్ ఆర్ట్స్ - మహిళల సాంప్రదాయ - 60 కేజీల క్వార్టర్ ఫైనల్ - సుచిక తరియల్ వర్సెస్ అల్తాన్ బైగ్లమా

*ఉదయం 5:30 - వుషు - పురుషుల చాంగ్‌క్వాన్ ఫైనల్ - సూరజ్ సింగ్ మయాంగ్లాంబం

*ఉదయం 5:30 - సెపక్‌టక్రా - పురుషుల టీమ్ రెగు గ్రూప్ స్టేజ్

*ఉదయం 6:15 - షూటింగ్ - 10మీ ఎయిర్ రైఫిల్ మహిళల వ్యక్తిగత క్వాలిఫికేషన్ - సోనమ్ ఉత్తమ్ మాస్కర్, విదర్శ కోచ్లుమ్‌కల్ వినోద్, ఎలావెనిల్ వలరివన్

*ఉదయం 6:15 - షూటింగ్ - 10మీ ఎయిర్ రైఫిల్ మహిళల టీమ్ ఫైనల్ - సోనమ్ ఉత్తమ్ మాస్కర్, విదర్శ కోచ్లుమ్‌కల్ వినోద్, ఎలావెనిల్ వలరివన్

*ఉదయం 6:30 - టేబుల్ టెన్నిస్ - మహిళల టీమ్ గ్రూప్ ఎఫ్ - ఇండియా వర్సెస్ ఇండోనేషియా

*ఉదయం 6:30 - టెక్బాల్ - మహిళల సింగిల్స్ కాంస్య పతక మ్యాచ్ - క్విమ్సీ జోక్విమ్ డిసౌజా

*ఉదయం 7:00 - టెక్బాల్ - మిక్స్‌డ్ డబుల్స్ కాంస్య పతక మ్యాచ్ - క్విమ్సీ జోక్విమ్ డిసౌజా, మహమ్మద్ అనాస్ ఇమ్రాన్

*ఉదయం 7:22: స్విమ్మింగ్ - పురుషుల 100మీ ఫ్రీస్టైల్ - హీట్ 5 - ఆకాష్ మణి, బెనెడిక్టైన్ బెనిస్టన్

*ఉదయం 7:37: స్విమ్మింగ్ - పురుషుల 100మీ బ్యాక్‌స్ట్రోక్ - హీట్ 3 - ఉత్కర్ష్ పాటిల్, రిషబ్ దాస్

*ఉదయం 9:00: టేబుల్ టెన్నిస్ - పురుషుల టీమ్ గ్రూప్ ఎఫ్ - భారత్ vs ఇండోనేషియా

*ఉదయం 10:30: క్రికెట్ - మహిళల సెమీఫైనల్ - భారత్ vs బంగ్లాదేశ్

*ఉదయం 11:00 - మిక్స్డ్ మార్షల్ ఆర్ట్స్ - పురుషుల సాంప్రదాయ -77 కేజీల క్వార్టర్ ఫైనల్ - వరుణ్ సన్యాల్

*ఉదయం 11:00 - షూటింగ్ - 10మీ ఎయిర్ రైఫిల్ మహిళల వ్యక్తిగత ఫైనల్ - సోనమ్ ఉత్తమ్ మస్కర్, విదర్శ కొచులుంకల్ వినోద్, ఎలావెనిల్ వలరివన్ (అర్హత సాధిస్తే)

*ఉదయం 11:30 - బ్యాడ్మింటన్ - మహిళల టీమ్ రౌండ్ 1 - భారత్ vs కజకిస్తాన్

*ఉదయం 11:30 - హాకీ - పురుషుల పూల్ ఎ - భారత్ vs ఇండోనేషియా

*మధ్యాహ్నం 12:30 - టేబుల్ టెన్నిస్ - మహిళల టీమ్ గ్రూప్ ఎఫ్ - భారత్ vs సింగపూర్

*మధ్యాహ్నం 2:30 తర్వాత - వుషు - మహిళల 52 కేజీల 1/8 ఫైనల్ - అపర్ణ

*మధ్యాహ్నం 2:30 తర్వాత - వుషు - పురుషుల 75 కేజీల 1/8 ఫైనల్ - విక్రాంత్ బలియాన్

*మధ్యాహ్నం 2:43 - స్విమ్మింగ్ - పురుషుల 100 మీటర్ల ఫ్రీస్టైల్ - ఫైనల్ - ఆకాష్ మణి, బెనెడిక్ట్ బెనిస్టన్ (అర్హత సాధిస్తే)

*మధ్యాహ్నం 2:43 - స్విమ్మింగ్ - పురుషుల 100 మీటర్ల బ్యాక్‌స్ట్రోక్ - ఫైనల్ - ఉత్కర్ష్ పాటిల్, రిషబ్ దాస్ (అర్హత సాధిస్తే)

*మధ్యాహ్నం 3:00 - టేబుల్ టెన్నిస్ - పురుషుల టీమ్ గ్రూప్ ఎఫ్ - భారత్ vs ఇరాన్

English summary

Asian Games 2026, Indian women's hockey team thrashed Uzbekistan 19-0 with Deepika's historic 8 goals. Check the complete Indian athletes schedule for September 20.