Ind vs SA:బోణీ కొట్టిన భారత్... పోరాడి ఓడిన సౌతాఫ్రికా..!
భారత్, దక్షిణాఫ్రికా మధ్య రాంచీలోని JSCA అంతర్జాతీయ స్టేడియం కాంప్లెక్స్లో జరిగిన మొదటి వన్డే మ్యాచ్ ఉత్కంఠభరితంగా సాగింది. 350 పరుగుల భారీ లక్ష్యాన్ని కాపాడుకున్న టీమ్ ఇండియా,దక్షిణాఫ్రికాను 332 పరుగులకే ఆలౌట్ చేసి, 17 పరుగుల తేడాతో విజయాన్ని సొంతం చేసుకుంది.
బౌలింగ్లో కుల్దీప్, హర్షిత్ రాణాల మెరుపులు
భారత బౌలర్లు దక్షిణాఫ్రికా బ్యాటింగ్ను సమర్థవంతంగా అడ్డుకున్నారు. ముఖ్యంగా స్పిన్నర్ కుల్దీప్ యాదవ్ అద్భుత ప్రదర్శన కనబరిచాడు.
- కుల్దీప్ యాదవ్: 4 వికెట్లు తీసి (4/68) దక్షిణాఫ్రికా మిడిల్ ఆర్డర్ను దెబ్బతీశాడు.
- హర్షిత్ రాణా: యంగ్ పేసర్ హర్షిత్ రాణా కూడా అద్భుతమైన సహకారం అందించాడు. కీలక సమయంలో 3 వికెట్లు పడగొట్టి దక్షిణాఫ్రికా ఛేజింగ్కు గండికొట్టాడు.
52వ సెంచరీ చేసిన రన్ మెషీన్
అంతకుముందు ప్రోటీస్ కెప్టెన్ టాస్ గెలిచి భారత్ను బ్యాటింగ్కు ఆహ్వానించాడు. బ్యాటింగ్ చేసిన భారత్... విరాట్ కోహ్లీ అద్భుతమైన సెంచరీ సహాయంతో నిర్ణీత 50 ఓవర్లలో 349 పరుగులు చేసింది. ఓపెనర్ యశస్వీ జైస్వాల్ తక్కువ స్కోరుకే వెనుదిరిగినప్పటికీ... రోహిత్ శర్మ తన ఫామ్ను కొనసాగించి 57 పరుగులు రాబట్టాడు. ఇక కెప్టెన్ కేఎల్ రాహుల్ చివర్లో మెరుపులు మెరిపించి 60 పరుగులు చేశాడు.దీంతో దక్షిణాఫ్రికా ముందు భారత్ భారీ విజయలక్ష్యాన్ని ఉంచింది. రో-కో జంట కలిసి 100 పరుగుల భాగస్వామ్యాన్ని నెలకొల్పారు.
రోహిత్ శర్మ 57 పరుగుల వద్ద ఔటైనప్పటికీ..విరాట్ కోహ్లీ ఎక్కడా తగ్గలేదు. వన్డేల్లో తన 52వ సెంచరీ నమోదు చేసి మొత్తంగా అంతర్జాతీయ క్రికెట్లో 83వ సెంచరీని నమోదు చేశాడు. ఇక సౌతాఫ్రికా బౌలర్లలో మార్కో యాన్సేన్,నాండ్రె బర్గర్,కార్బిన్ బాష్,బార్ట్మాన్లు చెరో రెండు వికెట్లు తీశారు.
దక్షిణాఫ్రికా బ్యాటర్లు చివరి వరకు పోరాడినప్పటికీ, భారత బౌలింగ్ దళం పట్టుదలతో వికెట్లు తీయడంతో 332 పరుగుల వద్ద వారి ఇన్నింగ్స్ ముగిసింది. ఈ విజయంతో టీమ్ ఇండియా మూడు మ్యాచ్ల వన్డే సిరీస్లో శుభారంభం చేసింది.
Click it and Unblock the Notifications
Sign in with Google