IPL 2024: ఐపీఎల్ నుంచి మొహమ్మద్ షమీ అవుట్ ! లండన్ లో సర్జరీ..!
వన్డే వరల్డ్ కప్ లో భారత జట్టు వరుసగా 10 విజయాలు సాధించి సెమీస్ వరకూ దూసుకురావడం ఓ ఎత్తయితే సెమీస్ లో మొహమ్మద్ షమీ ఒంటిచేత్తో అందించిన విజయం మరో ఎత్తు. అయితే వరల్డ్ కప్ లో కాలి గాయంతో బాధపడుతూనే టీమిండియాను సెమీస్ చేర్చిన షమీ ఆ తర్వాత గాయం కారణంగా జట్టుకు దూరమయ్యాడు. ఆప్ఘనిస్తాన్ తో టీ20, ఇంగ్లండ్ తో టెస్టు మ్యాచ్ లకు సైతం దూరమైన షమీ ఇప్పుడు ఐపీఎల్ 2024కు కూడా దూరమవుతున్నాడు.
వన్డే వరల్డ్ కప్ లో ఎడమకాలి మడమకు గాయం కావడంతో చికిత్స తీసుకుంటున్న మొహమ్మద్ షమీ కోలుకోకపోవడంతో లండన్ కు పయనమయ్యాడు. అక్కడ శస్త్రచికిత్స చేయించుకోవాలని షమీ నిర్ణయించుకున్నాడు. దీంతో ఐపీఎల్ టోర్నీ ఆడటం సాధ్యం కాదని తేలిపోయింది. ఈ నేపథ్యంలో షమీ ఐపీఎల్ టోర్నీకి దూరమవుతున్నట్లు అతని ఫ్రాంచైజీ గుజరాత్ టైటాన్స్ తో పాటు బీసీసీఐ కూడా నిర్ధారించాయి.
వాస్తవానికి షమీ కాలి గాయానికి చికిత్స కోసం జనవరి చివర్లోనే లండన్ కు వెళ్లాడు. అక్కడ మూడు వారాలుగా ఇంజెక్షన్లు కూడా తీసుకుంటున్నాడు. అయినా ప్రభావం లేకపోవడంతో చివరిగా సర్జరీ చేయాలని డాక్టర్లు నిర్ణయించారు. దీంతో సర్జరీ పూర్తయ్యాక తగిన విశ్రాంతి కూడా అవసరం కానుంది. ఈ నేపథ్యంలో ఐపీఎల్ టోర్నీలో షమీ ఆడటం సాధ్యం కాదని తేలిపోయింది. ఐపీఎల్ తర్వాత జరిగే టీ20 వరల్డ్ కప్ కూ షమీ అందుబాటులో ఉండకపోవచ్చని తెలుస్తోంది. ఈ ఏడాది అక్టోబర్, నవంబర్ లో జరిగే బంగ్లాదేశ్, న్యూజీలాండ్ టెస్టు సిరీస్ ల నాటికి షమీ కోలుకునే అవకాశాలున్నాయి.
Click it and Unblock the Notifications
Sign in with Google