చంద్రబాబు విశ్వప్రయత్నం

హైదరాబాద్: తెలుగుదేశం అధినేత చంద్రబాబు నాయుడు వచ్చే అసెంబ్లీ ఎన్నికలను చాలా తీవ్రంగా పరిగణిస్తున్నట్టు కనిపిస్తోంది. అధికార కాంగ్రెస్ పార్టీ కొన్ని వేల కోట్లను ఖర్చు చేసి అయినా అధికార పీఠాన్ని నిలుపుకోడానికి ప్రయత్నిస్తుండడంతో చంద్రబాబు నాయుడు కూడా తన స్పాన్సర్లతో క్రమం తప్పకుండా టచ్ లో ఉంటున్నట్టు తెలిసింది. తనవి అనుకున్న ఆ రెండు పత్రికలు సర్క్యులేషన్ కోసమో, మరి దేని కోసమో తెలుగుదేశం పార్టీకి ప్రాధాన్యం ఇవ్వకుండా చిరంజీవి "ప్రజారాజ్యం" పార్టీ వార్తలను, విశేషాలను బాగా కవర్ చేయడం చంద్రబాబు నాయుడిని కలవరపరుస్తోంది. చంద్రబాబు నాయుడు మొదటి నుంచి మీడియా శావీ. ఎంత చిన్న పత్రికలోనైనా తన మీద, పార్టీ మీద విమర్శలు వచ్చినా ఆయన తట్టుకోలేరు. తన మనుషులను రంగంలోకి దింపి ఆయా పత్రికల యాజమాన్యాలను తన వైపు మళ్ళించుకునే ప్రయత్నాలను ఆయన చేసేవారు. ఇప్పటికీ ఆయనది అదే పంథా. కానీ గతంలో లాగా ఆయనను ఆ రెండు పత్రికలు వెనకేసుకుని రావడం లేదు.

ఇక ఇతర విషయాలకు వస్తే, కాంగ్రెస్ నుంచి కంటే తెలుగుదేశం నుంచే చిరంజీవి పార్టీలోకి వలసలు ఎక్కువగా ఉండడం అందరికీ తెలిసిందే. ఈ పరిణామం కూడా చంద్రబాబు నాయుడిని తీవ్రంగా కలవరపరుస్తోంది. ఈ ప్రతికూల పరిణామాన్ని అనుకూలంగా మార్చుకోడానికి ఆయన ప్రయత్నిస్తున్నారు. అంటే సీనియర్ నాయకులు వెళ్ళిపోయిన చోట జూనియర్ నాయకులను భుజం తట్టి ప్రోత్సహిస్తున్నారు.

వెనుకబడిన కులాల వారికి వంద అసెంబ్లీ టికెట్లు కేటాయించాలన్న ప్రయత్నం తెలుగుదేశం పార్టీలో కనిపిస్తోంది. కొన్ని అసెంబ్లీ స్ధానలకు తెలుగుదేశం అధినేత అభ్యర్ధులను ఇప్పటికే ఖరారు చేసి వారితో ముఖాముఖి మాట్లాడడం కాంగ్రెస్ నాయకులకు ఆందోళన కలిగిస్తోంది.