చిరుకు ఆ పత్రికల మెగా మద్దతు!brఆ రెండు పెద్ద పత్రికల మద్దతు లభించడం చిరంజీవి పార్టీకి బోనసే....

హైదరాబాద్: చిరంజీవి పార్టీకి ఆ రెండు పత్రికలు (ఈనాడు, ఆంధ్రజ్యోతి) బాగా ప్రచారం ఇవ్వడం అధికార కాంగ్రెస్ పార్టీకి మింగుడు పడడం లేదు. ఈ రెండు పత్రికల కంటే వైఎస్ సొంత పత్రికకు అనేక కారణాల వల్ల సర్క్యులేషన్ అధికంగా ఉన్నప్పటికీ అది ప్రభుత్వ పత్రిక కాబట్టి క్రెడిబిలిటీ తక్కువగా ఉంటుందనడంలో సందేహం లేదు.

తెలుగుదేశం పార్టీ అధినేత చంద్రబాబు నాయుడికి అత్యంత సన్నిహితమైన ఆ రెండు పత్రికల యాజమాన్యాలు వైఎస్ మీద ఉన్న కోపంతో ( ఆ రెండు పత్రికలను వైఎస్ ప్రభుత్వం చాలా ఇబ్బందులు పెట్టిన విషయం తెలిసిందే) ఇప్పుడు చిరంజీవి పార్టీకి బ్రహ్మరథం పడుతున్నాయి. క్రమంగా చిరంజీవి పార్టీకి, చంద్రబాబు నాయుడి పార్టీకి మధ్య పొత్తులు కుదర్చడం ఈ రెండు పత్రికల అంతిమ లక్ష్యంగా కనిపిస్తోంది.

చిరంజీవి పార్టీ అంటే ఈ రెండు పత్రికల యాజమాన్యాలకు ఇష్టం లేనప్పటికీ వైఎస్ ను ఇబ్బంది పెట్టాలంటే తాత్కాలికంగా చిరు పార్టీకి మెగా మద్దతు ఇవ్వకతప్పదని ఆ యాజమాన్యాలు గ్రహించినట్టుంది. కులాలు, సామాజిక వర్గీకరణల నేపధ్యంలో చిరంజీవికి ఆ రెండు పత్రికల మద్దతు లభించడం అనుకోని అదృష్టమేనని చెప్పాలి. తిరుపతిలో బహిరంగ సభ జరుగనున్న 26 లోపు చిరంజీవి పార్టీలోకి తెలుగుదేశం నుంచే కాక, కాంగ్రెస్, టీఅర్ ఎస్ నుంచి భారీగా వలసలు ఉంటాయని రాజకీయ పరిశీలకులు చెబుతున్నారు.