Oil Companies:పెట్రోల్, డీజిల్, ఎల్పీజీ ధరల పెంపు ఫిక్స్ ? ఓఎంసీల ప్రతిపాదనలు..!
ఇరాన్ యుద్ధం (iran war) కారణంగా మన దేశంలో చమురు రంగంపై తీవ్ర ప్రభావం పడుతోంది. ఇరాన్ నుంచి రావాల్సిన ఎల్పీజీ, పెట్రోల్, డీజిల్ సకాలంలో భారత్ కు రాకపోవడం, అంతర్జాతీయంగా పెరిగిపోతున్న ధరల ప్రభావం భారత్ కు షాకులిస్తోంది. ఈ నేపథ్యంలో భారత్ లో చమురు విక్రయిస్తున్న ఆయిల్ మార్కెటింగ్ కంపెనీలు (oil companies) కేంద్రానికి వెంటనే పెట్రోల్ (petrol), డీజిల్ (Diesel), ఎల్పీజీ (LPG) ధరలు పెంచాలని ప్రతిపాదనలు ఇచ్చాయి.
ఇరాన్ వార్ తో ఎదురవుతున్న చమురు సంక్షోభం నేపథ్యంలో వినియోగదారులను అధిక ఇంధన ధరల నుండి రక్షించాలా లేక పెరుగుతున్న నష్టాలతో సతమతమవుతున్న ప్రభుత్వరంగ చమురు కంపెనీలకు మద్దతు ఇవ్వాలా అనేది కేంద్రం తేల్చుకోవాల్సి ఉంది. గురువారం నాడు ముడి చమురు ధరలు బ్యారెల్కు 126 డాలర్లకు పైగా పెరిగాయి. ఇరాన్పై నావికా దిగ్బంధం కొనసాగుతుందని అమెరికా అధ్యక్షుడు డొనాల్డ్ ట్రంప్ సూచించడమే దీనికి కారణం. ఇది హార్ముజ్ జలసంధిలో దీర్ఘకాలిక అంతరాయాల గురించి ఆందోళనలను పెంచింది, తద్వారా ప్రపంచ సరఫరా సంక్షోభాన్ని మరింత తీవ్రతరం చేసింది. చమురు కంపెనీలు నష్టాలను ఎదుర్కొంటున్న నేపథ్యంలో ఇంధన ధరలు త్వరలో పెరిగే సూచనలు వెలువడ్డాయి.
ఈ ధరల పెరుగుదల ప్రభుత్వరంగ చమురు మార్కెటింగ్ కంపెనీల (OMCs) నష్టాలను గణనీయంగా పెంచింది. గల్ఫ్ యుద్ధ ప్రభావంతో ఇంధన మార్కెట్లో ఇప్పటికే ఒత్తిడిని ఎదుర్కొంటున్న ఈ కంపెనీలు, అధిక అంతర్జాతీయ ఖర్చులను వినియోగదారులకు బదిలీ చేయడానికి, పంపు ధరలను పెంచడానికి తక్షణ అనుమతి కోరుతున్నాయి. పెట్రోల్, డీజిల్, ఏవియేషన్ టర్బైన్ ఫ్యూయల్ (ATF), ఎల్పిజి వంటి అన్ని ఉత్పత్తులపై కంపెనీల నష్టాలు భారీగా పెరుగుతున్నాయి.
అయితే ఓఎంసీలపై ఆర్థిక ఒత్తిడి ఉన్నప్పటికీ, ప్రభుత్వం వెంటనే ధరల పెంపునకు ఆమోదం తెలకపోవచ్చని భావిస్తున్నారు. ఇంధన ధరలను పెంచకుండా ఉంచడం తాజా అసెంబ్లీ ఎన్నికలకు లింక్ అయిందన్న ఊహాగానాలే ఇందుకు కారణం. గత వారంలో మే 1వ తేదీ నుండి ఇంధన ధరలు పెరుగుతాయన్న ఊహాగానాలను పెట్రోలియం శాఖ సంయుక్త కార్యదర్శి సుజాత శర్మ ఖండించినప్పటికీ, ప్రస్తుత పరిస్థితి ఎక్కువ కాలం స్థిరంగా ఉండదని నిపుణులు అభిప్రాయపడుతున్నారు. రిటైల్ ధరలు మారకపోతే, ఓఎమ్సిలు చివరికి ప్రభుత్వం నుండి నష్టపరిహారం కోరే అవకాశం ఉందని వారు స్పష్టం చేశారు.
Click it and Unblock the Notifications
Sign in with Google