తొలి తెలుగు తీర్పు ప్రేరణ

ఆంధ్రప్రదేశ్‌ రాష్ట్రంలో తెలుగు అమలుకు సంబంధించి ఒక విప్లవాత్మకమైన మార్పు వచ్చింది. ప్రభుత్వ కార్యకలాపాలు తెలుగు భాషలో సాగడమనేది ఇన్నాళ్లు నేతిబీరకాయ చందంగానే కనిపించింది. కానీ మనసుంటే మార్గం ఉందని నిజామాబాద్‌ అసిస్టెంట్‌ సెషన్స్‌ జడ్జి మంగారి రాజేందర్‌ (జింబో) నిరూపించారు. తెలుగు భాషలో తీర్పు వెలువరించి ఆయన ప్రభుత్వ కార్యకలాపాలను తెలుగులో నడపడానికి మార్గదర్శనం చూపారు. ఆయన ఈ నెల 19వ తేదీన తెలుగులో తీర్పు వెలువరించి తెలుగులో తీర్పు వెలువరించిన న్యాయమూర్తిగా ఘనతకెక్కారు. అయితే ఆయన అదేదో మొక్కుబడిగా చేయడం లేదని చెప్పడానికి దాఖలా వెంటనే కనిపించింది. తిరిగి ఆయన ఈ నెల 23వ తేదీన తెలుగు భాషలో తీర్పు వెలువరించారు. నిజామాబాద్‌ జిల్లా మళ్లూరు మండలం మానిక్‌భండార్‌ గ్రామానికి చెందిన నర్సమౌల్ల లింబాద్రి అనే వ్యక్తి బాలికపై అత్యాచారం చేశాడనే నమోదైన అభియోగాలపై ఆయన రెండవ తీర్పును వెలువరించారు. అతను అత్యాచారం చేశాడనడానికి ఆధారాలు లేవని, అయితే బాలిక గౌరవ మర్యాదలకు భంగం కలిగించడానికి ఆధారాలున్నాయని అంటూ అతనికి ఐదేళ్ల కారాగార శిక్ష విధిస్తూ మంగారి రాజేందర్‌ తీర్పు వెలువరించారు.

మంగారి రాజేందర్‌ తెలుగులో కవిత్వం రాస్తారు. కథలు కూడా రాస్తారు. సాహిత్య, న్యాయసంబంధమైన అనేక వ్యాసాలు రాశారు. ఆయన కవితా సంపుటులు, కథల సంపుటి, సాహిత్య వ్యాసాల సంపుటి గుండెతడి వెలువడ్డాయి. నియమనిబంధనల కన్నా అధికారుల్లో చిత్తశుద్ధి వుంటే తెలుగును అధికార భాషగా సమర్థంగా వాడడానికి వీలుందనే విషయాన్ని జింబో ఆచరణలో రుజువు చేశారు. అధికార భాషా సంఘం అధ్యక్షుడిగా ప్రముఖ జర్నలిస్టు ఎ.బి.కె. ప్రసాద్‌ వచ్చిన తర్వాత తెలుగును అమలు చేయించడానికి విశేషంగా కృషి చేస్తున్నారు. ఆయనకు ఉన్న విశేషమైన సంబంధాలు, పేరు ప్రఖ్యాతులు కూడా అందుకు ఉపయోగపడుతున్నాయి. అధికార భాషా సంఘం సభ్యుడిగా ఉన్న కాలువ మల్లయ్య కాలికి బలపం కట్టుకుని తిరుగుతూ తెలుగును అమలు చేయించడానికి అన్ని విధాలా కృషి చేస్తున్నారు. వీరిద్దరే కృషే తనను తెలుగులో తీర్పు వెలువరించడానికి ప్రేరేపించిందని జింబో చెప్పుకున్నారు. జింబో మార్గాన్ని అనుసరించడానికి చాలా మంది ఉత్సుకత పెరుగుతుందనడంలో సందేహం లేదు. అయితే ప్రజల్లో తెలుగుపై అభిమానం పెరగాలి. తెలుగులో వ్యవహారాలు నడవడం వల్ల తమకు కలిగే ఉపయోగం గురించి కూడా అవగాహన ప్రజల్లో కలగాలి.