పవన్ మనస్తాపం?

ప్రజారాజ్యం పార్టీ వ్యవహారాల పట్ల సినీ నటుడు, ఆ పార్టీ అధినేత చిరంజీవి సోదరుడు పవన్ కళ్యాణ్ తీవ్ర మనస్తాపానికి గురైనట్లు చెబుతున్నారు. చిరంజీవి మరో సోదరుడు నాగబాబు కూడా తీవ్ర నిరాశకు గురైనట్లు ప్రచారం జరుగుతోంది. పార్టీ నుంచి పరకాల ప్రభాకర్ వెళ్లిపోవడంపై నాగబాబు ఆ మధ్య వ్యాఖ్యానిస్తూ తాను, పవన్ కళ్యాణ్ వెళ్లిపోయినా ప్రజారాజ్యం పార్టీకి ఏమీ కాదని అన్నారు. ఎవరు వెళ్లిపోయినా ఏమీ కాదని ఆయన పైకి వ్యాఖ్యానించినట్లు కనిపించినప్పటికీ లోలోపల అసంతృప్తి గూడు కట్టుకుని పోవడం వల్లనే ఆయన ఆ విధంగా మాట్లాడరని విశ్లేషిస్తున్నారు.

మొదట్లో ప్రజారాజ్యం పార్టీ కోసం తీవ్రంగా ప్రచారం చేసిన నాగబాబు ఆ తర్వాత చాలా వరకు తగ్గించుకున్నట్లు తెలుస్తోంది. అలాగే, పవన్ కళ్యాణ్ యువరాజ్యం అధినేతగా అన్నయ్యను ముఖ్యమంత్రి పీఠంపై కూర్చోపెట్టాలని తపన పడ్డారు. పవన్ కళ్యాణ్ తన మిత్రులకు కొద్ది మందికి టిక్కెట్లు ఇప్పించుకున్నప్పటికీ పార్టీ పరిణామాలు ఆయనకు రుచించడం లేదని అంటున్నారు. హైదరాబాదులో ప్రచారం చేస్తూ అస్వస్థతకు గురైన పవన్ కళ్యాణ్ ఆస్పత్రిలో చికిత్స పొంది ప్రస్తుతం ఇంట్లో విశ్రాంతి తీసుకుంటున్నారు.

చిరంజీవి తలపెట్టిన ప్రజారాజ్యం ప్రజా రైలు యాత్రలో పవన్ కళ్యాణ్ కూడా వుంటారని చిరంజీవి చెప్పారు. అయితే పవన్ కళ్యాణ్ ఆ రైలు యాత్రలో లేరు. పార్టీ పరిస్థితి రుచించకనే ఆయన వెనక్కి తగ్గినట్లు చెబుతున్నారు. రెండో దశ ఎన్నికల్లో ఆయన ప్రచారం చేసే అవకాశాలు లేవని కూడా భావిస్తున్నారు. ఎన్నికలు అయిపోగానే తిరిగి తన సినీ జీవితంలో బిజీ కావాలని ఆయన అనుకుంటున్నట్లు సమాచారం.

స్వతహాగా ఆవేశపరుడైన పవన్ కళ్యాణ్ కు ఉన్నదున్నట్లు సూటిగా మాట్లాడడం అలవాటు. రాజకీయాలను కూడా ఆయన సూటిగానే చూశారు. దాంతో దానిలో వక్రరీతులు అర్థం కావడం లేదు. అర్థమయ్యే సరికి పీక లోతు మునిగిపోయినట్లు అయింది. దాంతో ఆయన పూర్తిగా విసిగిపోయినట్లు చెబుతున్నారు.