తెలంగాణ: రామోజీ ముందుచూపు

తెలంగాణ విషయంలో ఈనాడు అధిపతి రామోజీరావు చాలా ముందుచూపుతో వ్యవహరిస్తున్నట్లు కనిపిస్తోంది. తెలంగాణ రాష్ట్ర ఏర్పాటుకు ఆయన మనస్ఫూర్తిగా అంగీకరించకపోవచ్చు గానీ తన ప్రయోజానాల దృష్ట్యా దాన్ని అడ్డుకునే ప్రయత్నం మాత్రం చేయబోరని అర్థమవుతోంది. అంతేకాకుండా తెలంగాణ ఉద్యమానికి వ్యతిరేకంగా గానీ, తెలంగాణ రాష్ట్ర ఏర్పాటుకు గానీ ఆయన నడిపిస్తున్న ఈనాడు దినపత్రికలో గానీ, ఈటీవి2లో గానీ వార్తాకథనాలు రావడం లేదు. మిగతా దినపత్రికలు (కొంత మేరకు వార్త దినపత్రిక, జీ 24 గంటలు చానెల్ మినహాయింపు), టీవీ చానెళ్లు సమయం సందర్భం లేకుండా తెలంగాణ వ్యతిరేక వార్తాకథనాలను, చర్చా కార్యక్రమాలను ప్రతి రోజూ, ప్రతి క్షణం గుప్పిస్తున్నాయి. అర్థం పర్థం లేని చర్చా కార్యక్రమాలను నిర్వహించి అల్లరిపాలవుతున్నాయి. చర్చల్లో పాల్గొనడానికి పిలుస్తున్నవారి స్థాయిని కూడా వారు పట్టించుకోవడం లేదు. ఈ చర్చా కార్యక్రమాల్లో అర్థవంతమైన చర్చ ఎక్కడా జరగడం లేదు. జరగదని తెలిసి కూడా వాటికే ప్రాధాన్యం ఇస్తున్నాయి. అయితే అతి వెగటుగా మారినట్లే, ఆ చానెళ్ల ప్రతి రోజు చర్చా కార్యక్రమాలు కూడా వెగటు పుట్టిస్తున్నాయి.

రామోజీరావు నడిపిస్తున్న ఈటీవీ2 చానెల్ లో అటువంటి చర్చలు ఉండడం లేదు. తెలంగాణ, సమైక్యాంధ్రుల మధ్య కయ్యం పెట్టే చర్చలకు ఆ చానెల్ ఏ మాత్రం ప్రాధాన్యం ఇవ్వడం లేదు. అలాగే, ఈనాడు దినపత్రికలో కూడా తెలంగాణకు వ్యతిరేకంగా విశ్లేషణాత్మక కథనాలు రావడం లేదు. మిగతా కొన్ని దిన పత్రికలు మాత్రం కేంద్ర హోం మంత్రి చిదంబరంపై వ్యక్తిగత ఆరోపణలు చేస్తూ కూడా వార్తాకథనాలు ప్రచురించాయి. గత హోం మంత్రి శివరాజ్ పాటిల్ కు పట్టిన గతే చిదంబరానికి పడుతుందని హెచ్చరించాయి. ఇటువంటి వార్తాకథనాలు ప్రచురించే సమయంలో శివరాజ్ పాటిల్ ఉద్వాసనకు గురైన అంశాల తీరును, చిదంబరం చేపట్టిన అంశానికి మధ్య ఉన్న వ్యత్యాసాన్ని కూడా పట్టించుకోలేదు.

రామోజీరావుకు రాజకీయాల కన్నా వ్యాపారాలు ముఖ్యం కాబట్టి తెలంగాణ రాష్ట్రం ఏర్పడినా తన ప్రయోజనాలు దెబ్బ తినకుండా జాగ్రత్త పడుతున్నారు. పైగా, తెలంగాణ రాష్ట్రం ఏర్పడితే తన ప్రత్యర్థి వైయస్ జగన్ పై తీవ్రమైన దెబ్బ పడుతుందనే విషయం రామోజీకి తెలియంది కాదు. జగన్ ప్రాబల్యం తగ్గడం రామోజీరావుకు ఇష్టం కాబట్టి కూడా తెలంగాణ రాష్ట్ర ఏర్పాటుకు అంత వ్యతిరేకత ప్రదర్శించడం లేదని అనుకోవాలి. ఈనాడు సమైక్యాంధ్ర ఆందోళనలకు, తెలంగాణ ఆందోళనలకు సమప్రాధాన్యం ఇస్తున్నారు. ఆ రకంగా నిష్పాక్షికత ప్రదర్శించామని అనిపించుకోవడానికి, తెలంగాణ ప్రజల మద్దతు సంపాదించుకోవడానికి ఆయనకు ఉపయోగపడవచ్చు. మొత్తంగా రామోజీ రావు చాలా ముందు చూపుతో వ్యవహరిస్తున్నట్లు తోస్తోంది.