బాబుకు వైయస్ జగన్ దెబ్బ

తెలుగుదేశం పార్టీ అధ్యక్షుడు నారా చంద్రబాబు నాయుడికి కాంగ్రెసు పార్లమెంటు సభ్యుడు వైయస్ జగన్ భయం పట్టుకుంది. వైయస్ జగన్ వెంట తెలుగుదేశం పార్టీ ద్వితీయ శ్రేణి నాయకత్వం వెళ్తుందేమోనని ఆయన ఆందోళన చెందుతున్నట్లు సమాచారం. అక్కడక్కడ ఇప్పటికే తెలుగుదేశం పార్టీకి చెందిన ద్వితీయ శ్రేణి నాయకులు జగన్ వెంట వెళ్లారు. నెల్లూరు జిల్లాలో మరింతగా తెలుగుదేశం పార్టీకి నష్టం జరిగే ప్రమాదం ఉంది. పార్టీ అసమ్మతి శాసనసభ్యుడు నల్లపరెడ్డి ప్రసన్నకుమార్ రెడ్డి తాను వైయస్ జగన్ ఓదార్పు యాత్రలో పాల్గొంటానని చెప్పారు. ఆయన వెంటే కాకుండా ఇతరత్రా కూడా వైయస్ జగన్ కు తెలుగుదేశం పార్టీ క్యాడర్ సహకరించే అవకాశం ఉంది. వైయస్ జగన్ వల్ల కాంగ్రెసుకు జరిగే నష్టం కన్నా తెలుగుదేశం పార్టీకే ఎక్కువ నష్టం జరుగుతుందని అంచనా వేస్తున్నారు. పార్టీ అధికారంలో లేకపోవడం వల్ల ఆ నష్టం ఉంటుందని అనుకుంటున్నారు. ఈ పరిస్థితిలో చంద్రబాబు జిల్లాల నుంచి నివేదికలు తెప్పించుకుంటున్నారు. వైయస్ జగన్ కు లభిస్తున్న మద్దతుపై ఆరా తీస్తున్నారు. వైయస్ జగన్ కు అడ్డుకట్ట వేయడానికి ఎప్పటికప్పుడు విమర్శలు చేయాలని జిల్లా నాయకత్వాలకు సూచించారు. అయితే జిల్లా నాయకత్వాలు అందుకు సిద్ధంగా లేవు. దీంతో చంద్రబాబు ప్రత్యామ్నాయ మార్గాలు చూశారు.

జగన్ ను సమర్థంగా ఎదుర్కోలేకపోతే పార్టీకి నష్టం జరుగుతుందని భావించి హైదరాబాద్ కేంద్రంగా ఆయన వ్యూహరచన చేసినట్లు చెబుతున్నారు. ఆ వ్యూహరచనలో భాగంగానే తెలుగుదేశం సీనియర్ నాయకులు వైయస్ జగన్ పై విమర్శనాస్త్రాలు సంధిస్తున్నారు. చాలా కాలం వరకు జగన్ ను పట్టించుకోని ధోరణిలో వ్యవహరించిన చంద్రబాబు ఇటీవలి కాలంలో విమర్శలకు దిగుతున్నారు. వైయస్ జగన్ పై, దివంగత నేత వైయస్సార్ అక్రమ వ్యవహారాలపై తీవ్రంగా ఆరోపణలు చేస్తున్నారు. జగన్ సంపాదనపై ఆయన నిరంతరంగా ఆరోపణలు చేస్తున్నారు. తాజాగా, జగన్ ముందస్తుగా 84 కోట్ల రూపాయల పన్ను చెల్లించడంపై కూడా ఆయన ధ్వజమెత్తారు. వైయస్ జగన్ పై తెలుగుదేశం నాయకులు ప్రతి రోజూ విమర్శలు చేస్తున్నారు. తెలుగుదేశం నాయకులు ఎర్రంనాయుడు, వర్ల రామయ్య, గాలి ముద్దు కృష్ణమ నాయుడు, యనమల రామకృష్డుడు వైయస్ జగన్ పై విమర్శలు చేస్తున్నారు.

పాపపు సొమ్ముతో వైయస్ జగన్ ఆధికారంలోకి రావాలని తాపత్రయపడుతున్నారని గాలి ముద్దుకృష్ణమ నాయుడు వ్యాఖ్యానించారు. ఒక రకంగా కాంగ్రెసులోని జగన్ వ్యతిరేకులు, తెలుగుదేశం పార్టీ నాయకులు ఒకే గొంతుతో జగన్ పై విరుచుకుపడుతున్నారు. జగన్ వ్యవహారాన్ని చంద్రబాబు కేవలం కాంగ్రెసు పార్టీ అంతర్గత వ్యవహారంగానే చూడడం లేదు. తనకు జరిగే నష్టాన్ని పసిగట్టి ఆయన ముందస్తు చర్యలకు దిగారు. దాంతో వైయస్ జగన్ కు, చంద్రబాబుకు మధ్య పోరుగా ప్రస్తుత వాతావరణం చోటు చేసుకుంది.