ఇదీ కూడా బాబు ప్లానా?

"కాలం కలిసొస్తే ముఖ్యమంత్రిని అవుతా" అని బాలకృష్ణ చేసిన ప్రకటన కాంగ్రెస్ పత్రిక "సాక్షి"కి మహదానందం కలిగించింది. ఆ వార్తను ఆ పత్రిక పతాకశీర్షికగా ప్రచురించింది. మొన్న చంద్రబాబు నాయుడితో గంట సేపటికి పైగా మాట్లాడిన బాలయ్య మరుసటి రోజునే రాజమండ్రిలో ఈ ప్రకటన చేయడం తెలుగుదేశం నాయకులను విస్మయపరిచింది. బాలయ్య ప్రకటనను పత్రికలు వక్రీకరించాయని టిడిపి పార్లమెంటరీ పార్టీ నాయకుడు ఎర్రన్నాయుడు అన్నారు.

కానీ చంద్రబాబు నాయుడే బాలకృష్ణతో ఆ విధమైన ప్రకటన చేయించారని, బాలయ్య గ్లామర్ కు తోడు ఆయన ముఖ్యమంత్రి అభ్యర్ధి అంటే జనం తెలుగుదేశం పార్టీకి ఓట్ల వర్షం కురిపిస్తారని ఆశించి చంద్రబాబే బాలయ్యతో ఇటువంటి ప్రకటన చేయించి ఉండవచ్చని సీనియర్ తెలుగుదేశం నాయకుడొకరు అన్నారు. తన పేరు రాయకుండా ఈ అభిప్రాయాన్ని ప్రచురించుకోవచ్చని ఆయన తెలిపారు.

"పదవికి నేను అలంకారం కానీ, నాకు పదవి అలంకారం కాదు" అని బాలకృష్ణ నిన్న అదే సందర్భంలో వ్యాఖ్యానించడం విశేషం. "పార్టీ ఆదేశిస్తే అక్క పురందేశ్వరి మీద కూడా పోటీ చేస్తా" అన్న బాలయ్య వ్యాఖ్య చంద్రబాబుదేనని ఆ నాయకుడు చెప్పారు. అటువంటప్పుడు బాలయ్య చేసిన మరో వ్యాఖ్య కూడా చంద్రబాబుది కాకుండా ఎలా ఉంటుందని ఆయన ప్రశ్నించారు.