చిరంజీవి కాపు మాత్రమేనా?

మొదట్లో లైట్ గా తీసుకున్నా ఇప్పుడు చిరంజీవి పార్టీని ప్రధాన రాజకీయ పార్టీలు కూడా సీరియస్ గా తీసుకుంటున్నాయి. ఉత్తరాంధ్ర జిల్లాల్లో సంచలనం సృష్టిస్తున్న ప్రజారాజ్యం పార్టీని ఎలా ఎదుర్కోవాలన్న దానిపై ముఖ్యమంత్రి రాజశేఖరరెడ్డి, తెలుగుదేశం అధినేత చంద్రబాబు నాయుడు తమ పార్టీల్లోని మేధావులతో సుదీర్ఘ చర్చలు జరుపుతున్నారు. తెలుగుదేశం, కాంగ్రెస్ పార్టీలతో తాము పొత్తు పెట్టుకోబోమని అల్లు అరవింద్ ఢిల్లీలో స్పష్టం చేయడం, చిరంజీవి రోడ్ షోలకు రోజు రోజుకు జనం అధికంగా రావడం వంటి అంశాలు ప్రధాన రాజకీయ పార్టీలను కలవరానికి గురిచేస్తున్నాయి.

చిరంజీవి అంటే కాపు అన్న ఆలోచనతో అధికార కాంగ్రెస్ పార్టీ పావులు కదపాలనుకోవడం అవివేకం. చిరంజీవికి ఇతర అగ్ర వర్ణాల్లో అభిమానులు తక్కువగా ఉండవచ్చు కానీ ఆయనకు రాష్ట్ర జనాభాలో యాభై శాతానికి పైగా ఉన్న బిసి, ఎస్ సిలలో మంచి ఫాలోయింగ్ ఉంది. ఇక 20 శాతానికి పైగా ఉన్న కాపు ఉపకులాలైన బలిజ, తెలగ, ఒంటరి, తూర్పు కాపు, మున్నూరు కాపుల ఓట్లు ఆయనకు అత్యధికంగా పడే అవకాశాలు కన్పిస్తున్నాయి. కాంగ్రెస్ పార్టీలో ఇప్పటికీ కన్నా లక్ష్మీనారాయణ, మండలి బుద్ధప్రసాద్, సామినేని ఉదయభాను వంటి బలమైన కాపు నాయకులు ఉన్నారు. తెలుగుదేశం పార్టీలో మాత్రం ఉమ్మారెడ్డి వెంకటేశ్వర్లు వంటి ఉడిగిపోయిన కాపు నాయకులు తప్ప సరైన నాయకులు, కులాన్ని తమ వెంట నడిపించుకోగల నేతలు లేకపోవడం గమనార్హం.