సినిమా వాళ్ళకి పండగే పండగ

ప్రజారాజ్యం పార్టీ రాష్ట్ర రాజకీయ తెర మీదికి వచ్చినప్పటి నుంచి రాజకీయాల్లో సినిమావాళ్ళకి మరింత గిరాకీ పెరిగింది. చిరు పార్టీలో ఆయనే పెద్ద ఆకర్షణ. ఆ తర్వాత పవన్ కళ్యాణ్. శ్రీకాంత్, బ్రహ్మానందం వంటి ఆస్ధాన విధ్వాంసులు ఎటూ ఉన్నారు. చిరుపార్టీకి అల్లు అర్జున్, రామ్ చరణ్ వంటి హీరోల ప్రచారం అవసరమే లేదు. తెలుగుదేశం పార్టీ మాత్రం తారకరత్నను కూడా వదలకుండా నందమూరి అందగాళ్ళందరి సహకారం కోరుతోంది. నందమూరి వంశంలో బాలనటులెవరైనా ఉన్నా కూడా వారినీ వీధుల్లోకి తీసుకొచ్చి తిప్పడానికి చంద్రబాబు నాయుడు వెనుకాడే వారు కాదేమో.

వందేళ్ళకు పైగా చరిత్ర ఉన్న కాంగ్రెస్ పార్టీ కూడా ఈసారి ఎక్కువగా సినిమా పరిమళం కోసం పరితపిస్తోంది. నటులైతే చాలు, ముసలీ ముతకా అయినా ఫర్వాలేదన్నట్టు ఆ పార్టీ వ్యవహరించడం ఆశ్చర్యం కలిగిస్తోంది. హీరో కృష్ణకు ఒక ఫేవర్, జీవిత-రాజశేఖర్ దంపతులకు మరో ఫేవర్, జయసుధకో హామీ, ఎస్వీ కృష్ణారెడ్డికి మరో హామీ ఇచ్చి వారితో పిసిసి అధ్యక్షుడు డి. శ్రీనివాస్, వైఎస్ కు అత్యంత సన్నిహితుడు కెవిపి రామచంద్రరావు గ్రూపు ఫోటోలు దిగి సామాన్య ప్రజలకు ఎనలేని వినోదాన్ని పంచారు.

సిద్ధాంత బలం, ఒక నిర్ధిష్ట గమ్యం ఉన్న టీఅర్ ఎస్ కు సినిమా గ్లామర్ ఉన్న ఒకటే లేకపోయినా ఒకటే. దేవేందర్ గౌడ్ పార్టీకి మాత్రం సినిమా గ్లామర్ అవసరం కావచ్చు. ఒకనాటి విలన్ కాంతారావు దేవేందర్ గౌడ్ పార్టీ తరఫున ప్రచారం చేసే అవకాశాలున్నాయి. కానీ తగిన పారితోషికం అందిన తర్వాతే. ఏమైనా ముడితే తాము ఏ పార్టీ తరఫున ప్రచారం చేయడానికైనా సిద్ధమని అంటున్నారు ఫిల్మ్ నగర్, మోతీనగర్ లలో ఉంటున్న వృద్ధ నటీనటులు. భేష్. నటన వృత్త్తి కాబట్టి కథ ఎలా ఉన్నా సర్దుకుపోవాలి మరి.