జయప్రదకు చిరంజీవితో పనేమిటి?

ఒకనాటి హీరోయిన్, నేటి సమాజ్ వాది పార్టీ ఎంపీ జయప్రద చిరు పార్టీ గురించి ఎస్పీ అధినేత ములాయం సింగ్ యాదవ్ కు గొప్పలు ఎందుకు చెప్పినట్టు? ఒకప్పుడు తెలుగుదేశం పార్టీలో వెలిగిన జయప్రద ఆ తర్వాత అక్కడ నిరాదరణకు గురై మానసికంగా కుంగిపోయారు. ఆ సమయం సమాజ్ వాది పార్టీ ప్రధాన కార్యదర్శి అమర్ సింగ్ ఆమెను ఓదార్చి ములాయం సింగ్ కు చేరువ చేశారు. ఒక తెలుగు వనితకు ఉత్తరప్రదేశ్ లోని రామ్ పూర్ నియోజకవర్గంలో సమాజ్ వాది టికెట్ ఇచ్చి గెలిపించుకుని ములాయం, అమర్ సింగ్ లు గొప్ప ప్రయోగంలో విజయవంతమయ్యారు.

రాష్ట్రంలో సమాజ్ వాది పార్టీకి పెద్ద ఫాలోయింగ్ లేదు. డికె అరుణ తప్ప ఎవరూ ఆ పార్టీ తరఫున శాసనసభలో ఎవరూ లేరు. డికె అరుణ సాంకేతికంగా ఆ పార్టీ తరఫున పోటీ చేసినప్పటికీ ఆమెకు ఆ పార్టీ మీద గౌరవం లేదు. తాను ఇండిపెండెంట్ గా నైనా నెగ్గేదాన్నని ఆమె అభిప్రాయం. ఈ నేపధ్యంలో జయప్రద చిరంజీవి పార్టీతో మంతనాలకు ముందుకు రావడం ఆశ్చర్యం కలిగిస్తోంది. మాంత్రికుడు, రాజకీయ బ్రోకర్ అయిన అమర్ సింగ్ ను ఆమె వెంటేసుకు రావడం, ఒక విచిత్రమైన గిఫ్ట్ చిరుకు ఇవ్వడం ఇప్పుడు చర్చనీయాంశమైంది.