బిజెపి, టీఅర్ ఎస్ లతో చిరు స్టెప్పులు?

చిరంజీవి "ప్రజారాజ్యం" పార్టీలో గొప్ప మేధావులు ఉన్నారనడంలో సందేహం లేదు. ఉభయ కమ్యూనిస్టు పార్టీలు తెలుగుదేశంతో పొత్తుకు సిద్ధం కావడంతో ఇక ఇతర పార్టీల పొత్తులు ఎలా ఉంటాయన్న విషయంలో చర్చలు జరుగుతున్నాయి. చిరంజీవి పార్టీ మీద మహా మోజు మోజుపడిన నారాయణ ఆ పార్టీ హై కమాండ్ ఆదేశాలకు లొంగి తెలుగుదేశం వైపు వెళ్ళ వలసి వచ్చింది. ఈ నేపధ్యంలో "ప్రజారాజ్యం" ఒక జాతీయ పార్టీ అండను వెదుక్కోవలసిన అవసరం ఏర్పడింది. ఇప్పుడు ముంబై లో తీవ్రవాదుల దాడుల నేపధ్యంలో భారతీయ జనతా పార్టీ వెలుగులోకి వచ్చింది. గతంలో కార్గిల్ యుద్ధం నేపధ్యంలో బిజెపికి మంచి ఆదరణ లభించింది.

ఇప్పుడు మళ్ళీ అదే పరిస్ధితి పునరావృతమై కాంగ్రెస్ నాయకత్వంలోని యుపిఎ ఓడిపోయి, బిజెపి కూటమి అధికారంలోకి వచ్చే అవకాశం ఉందని భావిస్తున్న ప్రజారాజ్యం మేధావులు చిరంజీవిని బిజెపితో పొత్తు కోసం ఒప్పించే అవకాశాలు ఉన్నాయి. బిజెపితో సానుకూలంగా ఉన్న టీఅర్ ఎస్ కూడా ఆ కూటమిలో చేరవచ్చు. ప్రజారాజ్యం, బిజెపి, టీఅర్ ఎస్ కలిస్తే రాష్ట్రంలో ఆ కూటమికి చెప్పుకోదగిన స్ధానాలు వచ్చే అవకాశముంది.