ప్రజారాజ్యానికి పెద్ద దెబ్బ

పరకాల ప్రభాకర్ ఇప్పుడు వార్తల్లోకి వచ్చారు. చిరంజీవి ప్రజారాజ్యం పార్టీకి పునాదులు వేసిన ఆ నలుగురిలో ఆయన ఒకరు. ఆయన ఢిల్లీ జెఎన్ యులో పోస్ట్ గ్రాడ్యుయేట్. ఆ తర్వాత బిజెపి రాజకీయాలకు ఆకర్షితులై ఆ పార్టీకి పరోక్షంగా సేవలు అందించారు. ఈటీవీ యాంకర్ గా ఆయన తెలుగు వారికి సుపరిచితులు. ఆయనది పశ్చిమ గోదావరి జిల్లా. ఆయన తండ్రి పరకాల శేషావతారం మాజీ మంత్రి. తన సామాజిక వర్గానికే చెందిన చిరంజీవి రాజకీయాల్లోకి వచ్చేలా చేయడానికి పరకాల ప్రభాకర్ విశేషంగా కష్టపడ్డారు. చిరంజీవిని మెప్పించాలంటే ఆయనకు తగిన కథ చెప్పాలి సినిమాల్లో. మరి రాజకీయాల్లో అయితే ఇంకా పవర్ ఫుల్ కథ చెప్పాలి. ఆ విషయంలో పరకాల, డాక్టర్ మిత్రా సక్సెస్ అయ్యారు, కానీ చీమలు పెట్టిన పుట్టల్లో పాములు దూరుతాయన్న సహజ సిద్ధాంతాన్ని వారు అర్ధం చేసుకోలేకపోయారు.

ప్రజారాజ్యం పార్టీకి ఒక సైద్ధాంతిక పునాది వేసిన ఆ నలుగురిలో పరకాల ఒకరు. సామాజిక న్యాయం అనే నినాదం ఆయనదే. ఆ నినాదాన్ని పట్టుకుని జనంలోకి వెళ్ళిన చిరంజీవి ఆ నినాద సృష్టికర్తను విస్మరించారు. ప్రభాకర్ కు పార్టీలో ఏ మాత్రం ప్రాధాన్యం లేకుండా పోయింది. ప్రభాకర్ తన సొంత స్ధానమైన నర్సాపురం లోక్ సభ స్ధానం నుంచి టికెట్ ఆశించారు. ఆ టికెట్ ఆయనకు దక్కలేదు. ప్రజారాజ్యం టికెట్లను అల్లు అరవింద్ అమ్ముకుంటున్నారన్న విమర్శలు ఉన్నాయి. వాటిని నేరుగా ధృవీకరించకపోయినా పరకాల ప్రభాకర్ ఆ పార్టీ ఒక విష వృక్షంగా మారిందని ఆరోపించారు. చిరంజీవి ఇంకా సినిమా ఫక్కీలో వ్యవహరిస్తున్నారన్నది ప్రధాన ఆరోపణ. రాజకీయాలను కూడా సినిమా నిర్మాణంలా మార్చారని, అల్లు అరవింద్ నిర్మాతలా వ్యవహరిస్తూ టికెట్లు అమ్ముకున్నారని ఆరోపణలు వచ్చాయి.