హైకమాండ్ కు జగన్ చిట్టా

వైఎస్ జగన్ అక్రమాల చిట్టాను కాంగ్రెస్ అధిష్టానవర్గానికి పంపేందుకు కాంగ్రెస్ సీనియర్లు మరీ ముఖ్యంగా తెలంగాణ ప్రాంతానికి చెందిన వారు సన్నాహాలు చేసుకుంటున్నారు. తండ్రి ముఖ్యమంత్రిగా ఉండగా జగన్ కనీసం యాభై వేల కోట్లు అక్రమంగా సంపాదించుకున్నారని వీరు డాక్యుమెంట్లతో సహా హై కమాండ్ కు పంపడానికి తమ పాత ఫ్యాక్స్ మెషీన్లను బాగుచేయించుకుంటున్నారు. కర్ణాటక బిజెపి నాయకులతో జగన్ కుమ్మక్కయ్యారన్న ఆరోపణ మరింత ప్రధానమైనది. ఈ విషయం ఇప్పటికే హైకమాండ్ చెవిలో పడింది.

గాలి జనార్ధనరెడ్డితో కలిసి జగన్ అనేక వ్యాపారాలు చేస్తున్న విషయాన్ని కాంగ్రెస్ హైకమాండ్ తీవ్రంగా పరిగణిస్తోంది. కర్ణాటక బిజెపి ముఖ్యమంత్రి యెడ్యూరప్ప సహాయంతో బెంగుళూరు పరిసర ప్రాంతాల్లో జగన్ వెయ్యి ఎకరాలు కొనుగోలు చేసినట్టు తెలుస్తోంది. ఈ భూముల విలువ ప్రస్తుత మార్కెట్ విలువ ప్రకారం మూడు వేల కోట్లు కాగా వచ్చే ఐదేళ్ళలో ఆ విలువ పది వేల కోట్లకు పెరుగుతుందని అంచనా. ఒక దశలో జగన్ ను ముఖ్యమంత్రిని చేయడానికి అధిష్టానవర్గం సిద్ధపడినా ఆ తర్వాత ఈ ఆరోపణల మీద ప్రాధమిక నివేదిక పొందిన అనంతరం వెనక్కి తగ్గినట్టు తెలుస్తోంది. అధికారం దన్ను లేకుండా జగన్ తన వ్యాపార సామ్రాజ్యాన్ని నడపగలరా లేదా అన్న సందేహాలు వ్యక్తమవుతున్నాయి.