తెలంగాణ కార్డుతో బొత్సకు ఎసరు

తెలంగాణ కార్డును పార్టీలో అంతర్గత శత్రువుల మీద వాడడం దివంగత నేత వైయస్ రాజశేఖర రెడ్డికి తెలిసినంతగా మరెవరికీ తెలియదని ఇప్పటి వరకూ అనుకుంటూ వస్తున్నారు. కానీ, ఇప్పుడు కిరణ్ కుమార్ రెడ్డి రెండాకులు ఎక్కువే చదివినట్లున్నారు. పిసిసి అధ్యక్షుడు బొత్స సత్యనారాయణ పార్టీ పదవికి ఎసరు పెట్టేందుకు తెలంగాణ కార్డును తీస్తున్నట్లు ప్రచారం జరుగుతోంది. తనకు సన్నిహితులైన తెలంగాణ నాయకుల చేత పాత వాదనను కొత్తగా తెరమీదికి తెస్తున్నారు.

సీమాంధ్రకు చెందిన నాయకుడు ముఖ్యమంత్రిగా ఉన్నందున పిసిసి అధ్యక్ష పదవిని, శాసనసభ స్పీకర్ పదవిని తెలంగాణవారికి ఇవ్వాలనే వాదనను ముందుకు తెస్తున్నారు. కొంత మంది కాంగ్రెసు తెలంగాణ నాయకులు ఆ మేరకు అధిష్టానంపై ఒత్తిడి తెచ్చేందుకు సిద్ధపడుతున్నట్లు సమాచారం. తనకే ఎసరు పెట్టి ముఖ్యమంత్రి పదవి చేపట్టాలని ఆశపడుతున్న బొత్స సత్యనారాయణ కాళ్ల కిందికి ఆ రకంగా నీళ్లు తెచ్చేందుకు కిరణ్ కుమార్ రెడ్డి వ్యూహ రచన చేశారట. మరోవైపు, మద్యం సిండికేట్ల బాణాన్ని కూడా బొత్సపైకే ఆయన ఎక్కుపెట్టారు.

English summary

It is said that CM Kiran kumart Reddy has decided to use Telangana card against Botsa Satyanarayana.