బాబోయ్ దెయ్యం: 9నెలలుగా తెరచుకోని కోర్టు హాల్

మైసూరు: కర్ణాటక రాష్ట్రంలోని మైసూరు కోర్టు హాలులో దెయ్యం సంచరిస్తుందనే పుకార్లు సంచలనం సృష్టిస్తున్నాయి. ఆ దెయ్యాల భయానికి కోర్టు హాలు కొన్ని నెలలుగా మూతపడటం గమనార్హం. తొమ్మిది నెలల కిందట మూతబడిన సదరు కోర్టు హాలును ఇప్పటికీ తెరవొద్దంటూ అక్కడి న్యాయవాదులే డిమాండ్ చేస్తున్నారు.

వివరాల్లోకి వెళితే.. గతంలో ఇదే కోర్టులో జడ్జిగా పనిచేసిన వ్యక్తి రోడ్డు ప్రమాదంలో చనిపోయి దెయ్యమై అందులో సంచరిస్తున్నాడనే పుకార్లతో ఆ హాలును గత మే నెలలో మూసివేశారు. ప్రస్తుతం ఇందులో విరిగిపోయిన బల్లలు, కుర్చీలు వేసి స్టోర్ రూమ్‌గా వాడుతున్నారు. ఎన్నో ముఖ్యమైన కేసుల వాదనలకు ప్రముఖ న్యాయమూర్తులు, న్యాయవాదులకు నెలవుగా నిలిచిన ఆ కోర్టు హాలు... మూఢనమ్మకాల కారణంగా మూతబడిపోయింది.

న్యాయవాదులే పట్టుబట్టి, దగ్గరుండి మరీ ఆ హాలును మూయించడం గమనార్హం. అది కాకుండా కోర్టు అధికార వర్గాలు కూడా ఆ గదిని తెరవాలన్న ప్రయత్నం గానీ, అందులో ఎవరికైనా పోస్టింగ్ ఇవ్వాలన్న ఆలోచన గానీ చేయడం లేదు. ఒక వేళ తెరవాలని అనుకుంటున్నప్పటికీ దెయ్యాలను పారద్రోలే పూజలు చేయించే వరకు ఆ కోర్టు హాలును తెరవొద్దని జ్యోతిష్యులు సూచించారట.

ఇంతకి ఆ హాలులో దెయ్యం ఉందా లేదా అనేది ఇప్పటికీ సందేహంగానే ఉంది. కాగా, కొందరు కోర్టు హాలును తెరవాలని డిమాండ్ చేస్తుండగా.. మరికొందరు లాయర్లు మాత్రం వారితో విభేదిస్తున్నారు. న్యాయవాదులు రెండు గ్రూపులుగా విడిపోయి ఇదే విషయంలో పరస్పరం ఘర్షణలకు దిగుతున్నారు. ఏదైమైనా 9 నెలలు గడిచినా ఆ కోర్టు హాలు మాత్రం ఇప్పటికీ తెరచుకోలేదు.

English summary

A court hall in Mysuru has remained locked for more than nine months in the fear that the room is haunted, triggering a firestorm of protests from lawyers.