పోలీసు వేధింపులతో యువకుడి ఆత్మహత్య

నంద్యాల: పోలీసుల వేధింపులను తట్టుకోలేక ఒక యువకుడు లాడ్జీపై నుంచి దూకి ఆత్మహత్య చేసుకున్నాడు. కర్నూలు జిల్లా నంద్యాలలో సోమవారం సాయంత్రం వందలాది మంది చూస్తుండగా ఈ సంఘటన జరిగింది.

పోలీసుల కథనం ప్రకారం- ఎన్‌జిఒ కాలనీకి చెందిన రమేష్‌బాబు తమ్ముడు రహమాన్‌ గత నెల 20వ తేదీన హైదరాబాద్‌కు చెందిన కళ్యాణి అనే యువతితో కలిసి అదృశ్యమయ్యాడు. ఇద్దరు ప్రేమించుకుని ఇంట్లో పెద్దలను ఎదిరించే ధైర్యం లేక పరారయ్యారని చెబుతున్నారు. అయితే, కళ్యాణిని కిడ్నాప్‌ చేశారని ఆమె తలిదండ్రులు హైదరాబాద్‌లోని సరూర్‌నగర్‌ పోలీసు స్టేషన్‌లో ఫిర్యాదు చేశారు. ఈ కేసుకు సంబంధించి సరూర్‌నగర్‌ పోలీసు కానిస్టేబుల్‌ తరుణ్‌ ఐదు రోజుల క్రితం నంద్యాలకు వచ్చాడు. స్థానిక టూటౌన్‌ స్టేషన్‌లో విషయం తెలిపి, అదే స్టేషన్‌కు చెందిన మరో కానిస్టేబుల్‌ మహబూబ్‌ బాషాతో కలిసి రహమాన్‌ ఆచూకీ తెలియజేయాలని రమేష్‌ను వేధించిడం ప్రారంభించాడు. తన తమ్ముడి జాడ తెలియదని ఎంత చెప్పినా వారు వినిపించుకోలేదు. ప్రతి రోజు అతడ్ని పోలీసు స్టేషన్‌కు పిలిపించడం, ఆ తర్వాత వదిలిపెట్టడం ఇలా రెండు వారాలుగా కోనసాగుతూ వస్తోంది. సోమవారం ఇద్దరు కానిస్టేబుళ్లు రమేష్‌కు ఒక లాడ్జీకి తీసికెళ్లి రూములో నిర్బంధించి తీవ్రంగా కొట్టారు. మానసిక క్షోభకు గురి చేశారు. ఆ తర్వాత వదిలిపెట్టారు.

అంతటితో ఆగకుండా రమేష్‌ తల్లి హుసేనమ్మను కూడా ఇంటరాగేషన్‌ కోసమంటూ తీసికొని వెళ్లుతుండగా రమేష్‌ అడ్డు పడ్డాడు. తనను తీవ్రంగా కొట్టారని, పోలీసులు తన తల్లిని కూడా కొడతారని, ఇక తను బతకనని అంటూ లాడ్జి పైకి వెళ్లి అక్కడి నుంచి దూకి ఆత్మహత్య చేసుకున్నాడు. దీంతో ఇద్దరు కానిస్టేబుళ్లూ పారిపోయారు.

రమేష్‌బాబు ఆత్మహత్య చేసుకోవడానికి తమ పోలీసులు చేసిన తప్పే కారణమని జిల్లా ఎస్పీ సీతారామాంజనేయులు అన్నారు. రమేష్‌ ఆత్మహ్యతకు కారకులైన సరూర్‌నగర్‌ పోలీసు స్టేషన్‌ కానిస్టేబుల్‌ తరుణ్‌ను, నంద్యాల టూటౌన్‌ పోలీసుల స్టేషన్‌ కానిస్టేబుల్‌ మహబూబ్‌ బాషాను సస్పెండ్‌ చేస్తున్నట్లు ఆయన తెలిపారు.