భారత్‌ పాక్‌ చెలిమే అమెరికా ఆకాంక్ష

వాషింగ్టన్‌ః భారత పాక్‌ దేశాల మధ్య సత్సంబంధాలు నెలకొనాలని,అందువల్ల దేశాలకు ప్రయోజనం చేకూరుతుందని అమెరికా రక్షణ శాఖ మంత్రి రమ్స్‌ఫీల్డ్‌ అభిప్రాయపడ్డారు. అమెరికా, పాకిస్తాన్‌ ల మధ్య చిరకాలస్నేహం వుంది... అది వ్యూహాత్మకమైన సంబంధం... ఈ సంబంధం వల్ల ఉభయదేశాలు పలు ప్రయోజనాలు పొందాయని రమ్స్‌ఫీల్డ్‌ అన్నారు. బుధవారం రమ్స్‌ ఫీల్డ్‌ పాక్‌ అధ్యక్షుడు ముషారఫ్‌ తో సమావేశమైన అనంతరంవిలేకరులతో మాట్లాడుతూ ఈ వ్యాఖ్యలు చేశారు. పాకిస్తాన్‌ తోస్నేహం వున్నదంటున్నారు కదా... అవసరమైతే పాక్‌ కు ఆయుధ సాయంఅందిస్తారా అనే ప్రశ్నకు ఈ ప్రశ్న విదేశాంగ శాఖ మంత్రి కొలెన్‌ పావెల్‌ ను అడగండంటూ రమ్స్‌ఫీల్డ్‌ సమాధానాన్ని దాటవేశారు.

ఆసియా ఉపఖండంలో భారత్‌, పాకిస్తాన్‌ లు ఎంతో కీలకమైనవని, ఈ రెండు దేశాలూ సమస్యను శాంతియుతంగా పరిష్కరించుకోవాలని ఆయన అన్నారు. అమెరికా పాకిస్తాన్‌ దేశాల మధ్య రక్షణపరమైన సంబంధాలను బలోపేతం చేసేందుకు గతంలో వున్న సంప్రతింపుల సంఘాన్ని పునరుద్ధరించినట్లు ఆయన చెప్పారు. అమెరికా ముఖ్యంగా ప్రపంచ దేశాలన్నీ పాకిస్తాన్‌ కు ఎంతో రుణపడివున్నాయని రమ్స్‌ఫీల్డ్‌ ముషారఫ్‌ ను ప్రశంసలతో ముంచెత్తారని భావిస్తున్నారు. ముషారఫ్‌ ను కలిసిన సందర్భంగా దక్షిణాసియాలో రాజకీయ,మిలటరీ పరిస్థితుల గురించి చర్చించనట్లు ఆయన చెప్పారు.