గుజరాత్‌లో షబానాఆజ్మికి నోఎంట్రీ

అహ్మదాబాద్‌ః మత ఘర్షణలతో అట్టుడికిపోతున్న గుజరాత్‌ లోని సున్నిత ప్రాంతాల్లో సందర్శించాలనుకున్న సినీనటి షబనా ఆజ్మితో పాటు పలువురు ప్రతిపక్ష ఎం.పి.లకు చుక్కెదురైంది. సిపిఎం నేతసీతారాం ఏచూరి, షబనా ఆజ్మి మరికొంతమంది ఎం.పి.లు శనివారం గుజరాత్‌ లో మతఘర్షణలు జరిగిన ప్రాంతాల్లో సందర్శించేందుకు రెడీ అయ్యారు.

అయితే సున్నిత ప్రాంతాల్లో పర్యటించేందుకువీరికి అనుమతి నిరాకరించారు. షబనా ఆజ్మితో పాటు సమాజ్‌ వాది పార్టీ నేతలు అమర్‌సింగ్‌, రాజ్‌ బబ్బర్‌ కూడా అహ్మదాబాద్‌ లోని సున్నిత ప్రాంతాల్లో పర్యటించేందుకు ప్రయత్నించారు. ఒక వర్గం ప్రజలు ఇంకా ఆగ్రహావేశాలతోనే వున్నారని ఎం.పి.లను అక్కడికి అనుమతిస్తే ఊహించని పరిణామాలు జరిగే ప్రమాదం వున్నందునే వారిని అనుమతించలేదని పోలీసులు చెప్పారు. అయితే షబనా ఆజ్మి హోటల్‌ రూము నుంచే పలువురికి ఫోన్‌ చేసి యోగక్షేమాలు కనుక్కున్నారు. మైనారిటీ వర్గాలకు చెందిన వారి పరిస్థితి దయనీయంగా వున్నదని షబానా అజ్మి ఆవేదన వ్యక్తం చేశారు.