కర్ణాటకతో మరో జలవివాదం

హైదరాబాద్‌ః పొరుగు రాష్ట్రం కర్నాటకతో ఆంధ్రప్రదేశ్‌కు మరో జలవివాదం ప్రారంభమైంది. రాయలసీమ జిల్లాల్లో వందలాది కిలోమీటర్లు ప్రవహించే పెన్నానదిపై ఆనకట్ట నిర్మాణానికి కర్ణాటక చేస్తున్న సన్నాహాలపై అనంతపురం జిల్లా రైతులు తీవ్ర ఆందోళన వ్యక్తం చేస్తున్నారు.

పెన్నానదిపై కోలార్‌ జిల్లాలో కర్ణాటక నిర్మిస్తున్న డామ్‌ వల్ల హిందూపురం నియోజకవర్గంలోని కనీసం 30 చెరువులు ఎండిపోయే అవకాశం వుంది. సాగునీటివిషయం పక్కనపెట్టి తాగునీటికే తీవ్రమైన ఇబ్బంది తలెత్తుతుందని అనంతపురం జిల్లా ప్రజలు అలజడి చెందుతున్నారు. కొత్తగా వందలాది ఎకరాల సాగుకోసం నిబంధనలకు, నైతిక సూత్రాలకు తిలోదకాలు వదిలి కర్ణాటక ప్రభుత్వం ఈ కొత్త ప్రాజెక్టును ప్రారంభించిందని అనంతపురం జిల్లాకు చెందిన నేతలు ఆరోపిస్తున్నారు. ఈ ప్రాజెక్టును నిలిపివేయడానికివీలుగా రాష్ట్ర ప్రభుత్వం తక్షణమే కలగజేసుకోవాలని వారు డిమాండ్‌ చేస్తున్నారు.