ఛోటా షకీల్‌తో బాలీవుడ్‌ సంబంధాలు

ముంబాయి: ప్రముఖ బాలీవుడ్‌ నటుడు సంజయ్‌ దత్‌కు అండర్‌వరల్డ్‌ డాన్‌ చోటా షకీలుకు మధ్య గల సంబంధాలను తెలియజేసే టేప్‌లను పోలీసులు సోమవారం విడుదల చేశారు. మరో ముగ్గురు బాలీవుడ్‌ ప్రముఖులకు కూడా పాకిస్థాన్‌కు చెందిన ఛోటా షకీలుతో గల సంబంధాలను వెల్లడించే ఆడియో క్యాసెట్లను ముంబాయి ప్రత్యేక కోర్టు ముందువినిపించారు. భరత్‌ షా కేసులో వారు ఈ టెలిఫోన్‌ సంభాషణల ఆడియో టేప్‌ను కోర్టు ముందు ఉంచారు.

సంజయ్‌దత్తుతో పాటు దర్శకుడు, నటుడు మహేష్‌ మంజ్రేకర్‌, నిర్మాత హరీష్‌ సుగంధ్‌, దర్శకుడు సంజయ్‌ గుప్తాలు చోటా షకీలుతో జరిపిన సంభాషణలు ఈ క్యాసెట్లలో రికార్డయి వున్నాయి. బాలీవుడ్‌ నటులు గోవింద, రితిక్‌ రోషన్‌లకు అండర్‌ వరల్డ్‌ మాఫియా నుంచి ముప్పు ఉన్నదన్న ప్రచారం జరుగుతున్న నేపథ్యంలో ఛోటా షకీలుతో జరిపిన టెలిఫోన్‌ సంభాషణల్లో వారిద్దరిపేర్లు కూడా ప్రస్తావనకు రావడం విశేషం.