పోటా కింద నెడుమారన్‌అరెస్టు

చెన్నైః ప్రత్యర్ధి రాజకీయ నాయకులపై కత్తిగట్టిన తమిళనాడు ముఖ్యమంత్రి జయలలిత విమర్శల దుమారాన్ని ఏ మాత్రం లెక్కచేయకుండా తన పనితాను చేసుకుపోతున్నారు. ఎల్‌టిటిఇని సమర్ధించిన ఆరోపణలపై ఎండిఎంకె నేత వైగోను పోటా కింద అరెస్టు చేసిన జయ ప్రభుత్వం తాజాగా మరో తమిళ నేత
నెడుమారన్‌ను కూడా పోటా కింద అదుపులోకి తీసుకున్నది.

గత ఏప్రిల్‌లో ఎల్‌టిటిఇకి మద్దుతుగా నెడుమారన్‌ సదస్సు నిర్వహించినట్టుగా తమిళనాడు పోలీసులు ఆరోపించారు. గురువారం రాత్రి మైలాపూర్‌లో వున్న నెడుమారన్‌ ఇంటిపై పోలీసులు దాడి చేసిఅరెస్టు చేశారు. పోటా కింద అరెస్టయిన సీనియర్‌ నేతల్లో ఆయన రెండోవారు. కాగా ఎల్‌టిటిఇని సమర్ధించినందుకు జయ ప్రభుత్వం తనకిచ్చిన బహుమానం ఇదని ఎలాంటి సవాళ్లనైనా ఎదుర్కోవడానికి తాను సిద్ధంగా వున్నానని నెడుమారన్‌ చెప్పారు. ఎల్‌టిటిఇకి తన మద్దతు కొనసాగుతుందని ఆయన స్పష్టం చేశారు. అణిచివేత ధర్మపోరాటాన్ని తుడిచిపెట్టజాలదని ఆయన చెప్పారు.