ఉపరాష్ట్రపతిగా షెకావత్‌ ఎన్నిక

న్యూఢిల్లీః ఉపరాష్ట్రపతి పదవికి సోమవారం నాడు జరిగిన ఎన్నికల్లో అధికార ఎన్‌డిఎ కూటమి అభ్యర్ధి, సీనియర్‌ బిజెపి నేత భైరాన్‌సింగ్‌ షెకావత్‌ ఎన్నికయ్యారు. సమీప కాంగ్రెస్‌ అభ్యర్ధి సుశిల్‌కుమార్‌ షిండే కంటే ఆయనకు 149 ఓట్లు అధికంగా వచ్చాయి. సోమవారం ఉదయం జరిగిన పోలింగ్‌లో సభ్యులంతా ఉత్సాహంగా పాల్గొని ఓటేశారు.

పోలింగ్‌ ప్రారంభమైన తొలి గంటలోనే ఎలక్టోరల్‌ కాలేజీలో దాదాపు సగం మంది ఓటేశారు. ప్రధాని వాజ్‌పేయి, డిప్యూటీ ప్రధాని అద్వానీ, కాంగ్రెస్‌ నేత సోనియా గాంధీ,స్పీకర్‌ మనోహర్‌జోషి తొలుత ఓటు వేశారు. మాజీ ప్రధానులు దేవెగౌడ, చంద్రశేఖర్‌, డిప్యూటీస్పీకర్‌ సయీద్‌, రాజ్యసభలో ప్రతిపక్ష నాయకుడు మన్మోహన్‌సింగ్‌, సునీల్‌దత్‌ కూడా ఉదయమే తమ ఓటు హక్కు వినియోగించుకున్నారు. రాజ్యసభకు కొత్తగా ఎన్నికైన అలెగ్జాండర్‌, తృణమూల్‌ కాంగ్రెస్‌ తిరుగుబాటు నేత అజిత్‌పాంజా కూడా పొద్దున్నే పోలింగ్‌ కేంద్రం వద్ద కనిపించారు.తృణమూల్‌ కాంగ్రెస్‌ ఎన్నికలకు దూరంగా వున్నారు. పోటా కిందఅరెస్టయిన వైగో కూడా ప్రత్యేక అనుమతితో ఓటింగ్‌కుహాజరయ్యారు.