ప్రమోద్‌ రాజీనామా చేయరు: బిజెపి

న్యూఢిల్లీ: ఇండియన్‌ఎక్స్‌ప్రెస్‌ జర్నలిస్టు శివానీ భట్నాగర్‌ హత్యవిషయంలో వచ్చిన ఆరోపణల నేపథ్యంలో పార్లమెంటరీ వ్యవహారాల మంత్రి ప్రమోద్‌ మహాజన్‌ రాజీనామా చేయాలనే డిమాండ్‌ను భారతీయ జనతా పార్టీ త్రోసిపుచ్చింది. బిజెపికి, జాతీయ ప్రజాస్వామ్య కూటమి (ఎన్‌డిఎ) ప్రభుత్వానికి వ్యతిరేకంగా జరుగుతున్న రాజకీయ కుట్రలో ఈ ఆరోపణలు భాగమని బిజెపి అధికార ప్రతినిధి ముక్తర్‌ అబ్బాస్‌ నక్వీ శుక్రవారం అన్నారు.

ప్రమోద్‌ మహాజన్‌ గౌరవించదగిన బిజెపి నేత,సీనియర్‌ మంత్రి. ఆయన రాజీనామా చేయరు. తప్పుడు, కుట్రపూరిత ఆరోపణలకు ప్రతిస్పందిస్తూ పోతే మన ప్రజాస్వామ్య చట్రం విచ్ఛిన్నమవుతుంది అని నక్వీ అన్నారు. దర్యాప్తులో సహకరించాల్సింది పోయి శర్మ నిరాధారణమైన ఆరోపణలు చేయడానికి మీడియాను వాడుకోవడం దురదృష్టకరమని ఆయన అన్నారు.