కరవునివారణకు సలహాలివ్వండిః బాబు

హైదరాబాద్‌ః రాష్ట్రంలో కరవు పరిస్థితి ఇంకా తీవ్రంగా వుండడం పట్ల ముఖ్యమంత్రి చంద్రబాబు నాయుడు ఆందోళన వ్యక్తం చేశారు. కరవు నివారణకు ఎన్ని నిధులైనా ఖర్చు చేసేందుకు ప్రభుత్వం సిద్ధంగా వున్నదని ఆయన వెల్లడించారు. తీవ్రరూపంలో వున్న కరవు నివారణకు సలహాలివ్వాల్సిందిగా ఆయన నిపుణులనుకోరారు. గ్రామీణాభివృద్ధిపై ప్రారంభమైన మూడు రోజుల సదస్సులో ఆయన ప్రసంగించారు. నీరు-మీరు, వాటర్‌ షెడ్‌ పధకాల వల్ల భూగర్భజలాల మట్టాలు గణనీయంగాపెరిగాయని అధికారులు ముఖ్యమంత్రికి వివరించారు.

భూగర్భనీటిమట్టాలు పెరగడం పట్ల సంతృప్తి వ్యక్తం చేసిన చంద్రబాబు కరవు తీవ్రత పట్ల ఆందోళన వ్యక్తం చేశారు. జాతీయ నదులను అనుసంధానం చేయడమే దేశంలో జలవివాదాలకు పరిష్కారం అని చంద్రబాబు ఈ సమావేశంలో అభిప్రాయపడ్డారు. గంగా-కావేరీ నదులను అనుసంధానం చేయాల్సిన అవసరాన్ని ఆయన నొక్కి చెప్పారు. ఈఅంశంపై త్వరలో కేంద్రంతో మాట్లాడతానని చంద్రబాబు అన్నారు.