దేవదాసు - భారత్‌ ఆస్కార్‌ఎంట్రీ

ముంబై: 75వ అకాడెమీ అవార్డుల ఎంపికకు భారత్‌ అధికార చిత్రంగా హిందీ చిత్రం దేవదాసు ఎంపికైంది. శక్తిశమంతా అధ్వర్యంలోని 16 మంది సభ్యుల కల ఫిల్మ్‌ ఫెడరేషన్‌ ఆఫ్‌ ఇండియా కమిటీ ఆదివారం సమావేశమై దేవదాసును ఆస్కార్‌ అవార్డులకు పంపించాలని నిర్ణయించింది.

గత ఏడాది లగాన్‌ ను ఎంపిక చేయగా, అది విదేశీ చిత్రాల్లో ఉత్తమ చిత్రంగా ఆస్కార్‌ కు నామినేట్‌ అయింది. అవార్డు రాకపోయినా, బాలీవుడ్‌ కు విదేశాల్లో మంచి గుర్తింపు తీసుకువచ్చిందా చిత్రం. దీంతో ఈసారి కూడా బాలీవుడ్‌ చిత్రమే పంపాలని భారత్‌ భావిస్తోంది. ఈ ఏడాది కేన్స్‌ లో ప్రదర్శితమైన దేవదాసు చిత్రం అన్ని విధాల తగినదని భావిస్తున్నారు.

ఈ ఏడాది దేవదాసుకు రెండు హిందీ చిత్రాల నుంచి గట్టి పోటీ ఎదురైంది. కబీఖుషీ కబీగమ్‌, ది లెజెండ్‌ ఆఫ్‌ భగత్‌ సింగ్‌ చిత్రాలు దేవదాస్‌ కు గట్టీ పోటీ ఇచ్చినప్పటికీ కమిటీ దేవదాస్‌ వైపే మొగ్గు చూపింది. ఈ సారి పరిశీలనకు వచ్చిన చిత్రాల్లో మణిరత్నం దర్శకత్వం వహించిన కన్నాత్తిల్‌ ముతమిట్టల్‌(అమృత), అగ్నివర్ష చిత్రాలు కూడా ఉన్నాయి. ఐశ్వర్యరాయ్‌, షారూఖ్‌ ఖాన్‌ నటించిన ఈ దేవదాసు చిత్రం భారతీయ చలన చిత్రరంగంలో అత్యంత భారీ బడ్జెట్‌ చిత్రం. ఈ చిత్రానికి దర్శకుడిగా సంజయ్‌ భన్సాలీకి మంచి పేరు వచ్చింది. కానీ ఇండియాలో సినిమా అంతగా విజయవంతం కాలేదు. బ్రిటన్‌ లాంటి దేశాల్లో మంచి కలెక్షన్లు రావడంతో విదేశీయులకు ఈ సినిమా నచ్చుతుందని ఆస్కార్‌ కు దేవదాసును ఎంపిక చేసినట్లు తెలుస్తోంది.