లేడీ డాక్టర్‌, నర్సుల సస్పెన్షన్‌

కర్నూలు: వైద్యం అందించడంలో నిర్లక్ష్యంగా వ్యవహరించారనే ఆరోపణపై ప్రభుత్వం ఒక లేడీ డాక్టర్‌ను, ఇద్దరు నర్సులను సస్పెండ్‌ చేసింది. కర్నూలు జిల్లా ఆత్మకూరు ప్రాథమిక ఆరోగ్య కేంద్రం (పిహెచ్‌సి) లేడీ డాక్టర్‌, ఇద్దరు నర్సులు సస్పెండ్‌ అయ్యారు.

ప్రసూతికి వచ్చిన నాగమ్మ అనే మహిళకు వైద్య సేవలందించడంలో వారు నిర్లక్ష్యం ప్రదర్శించినట్లు విచారణలో తేలింది. డాక్టర్ల నిర్లక్ష్యం వల్ల ఆస్పత్రిలో ఒక శిశువు జన్మించి మరణించగా, మరో శిశువు ఇంటి వద్ద పుట్టి మరణించింది. ప్రాణాపాయ స్థితిలో ఆత్మకూరు పిహెచ్‌సిలో చేరిన నాగమ్మకు వైద్యం అందించడంలో లేడీ డాక్టర్‌ నిర్లక్ష్యం ప్రదర్శించారని విమర్శలు వచ్చాయి. లేడీ డాక్టర్‌, నర్సుల నిర్లక్ష్యం వల్ల ఆత్మకూరు పిహెచ్‌సి నుంచి నాగమ్మను కర్నూలు ఆస్పత్రికి తరలించాల్సి వచ్చింది.