దేశంపైనా పోరాటం: వెంకయ్య

హైదరాబాద్‌: రాష్ట్రంలో తెలుగుదేశం ప్రభుత్వ ప్రజావ్యతిరేక విధానాలపై తమ పార్టీ పోరాటాలు చేస్తుందని భారతీయ జనతా పార్టీ (బిజెపి) జాతీయాధ్యక్షుడు ఎం. వెంకయ్యనాయుడు చెప్పారు. బిజెపి రాష్ట్ర కౌన్సిల్‌ సమావేశంలో గురువారం ఆయన ఆ విషయం చెప్పారు.

తెలుగుదేశం తమ మిత్రపక్షమే అయినప్పటికీ ప్రజా వ్యతిరేక విధానాలపై పోరాడుతామని ఆయన చెప్పారు. రాష్ట్రంలో పొత్తులు, సీట్ల సర్దుబాట్ల గురించి మాట్లాడడం ఆపేసి పార్టీని విస్తరించడానికి కృషి చేయాలని ఆయన కౌన్సిల్‌ సభ్యులకు సూచించారు. జాతీయ ప్రజాస్వామ్య కూటమి (ఎన్‌డిఎ) చేపట్టిన అభివృద్ధి, ప్రజా సంక్షేమ కార్యక్రమాలను ప్రజల్లోకి తీసికెళ్లి పార్టీని పటిష్టం చేయాలని ఆయన కోరారు. దక్షిణ భారత దేశంలో తమ పార్టీకి మంచి భవిష్యత్తు ఉన్నదని ఆయన చెప్పారు. వచ్చే లోక్‌సభ ఎన్నికల్లో తమ పార్టీ 300కు పైగా సీట్లు గెల్చుకుంటుందని ఆయన చెప్పారు.