ఆజాద్‌తోనే అసమ్మతి అమీతుమీ

హైదరాబాద్‌: వామపక్షాలతోనూ, తెలంగాణ రాష్ట్ర సమితి (టిఆర్‌ఎస్‌)తోనూ ఎన్నికల అవగాహన ఉంటుందని ప్రదేశ్‌ కాంగ్రెస్‌ కమిటీ(పిసిసి) అధ్యక్షుడు డి. శ్రీనివాస్‌ అన్నారు. పొత్తులపై తమ అఖిల భారత కాంగ్రెస్‌ కమిటి(ఎఐసిసి) కృషి చేస్తోందని ఆయన అన్నారు. ఢిల్లీ నుంచి తిరిగి వచ్చిన ఆయన సోమవారంవిలేకరుల సమావేశంలో మాట్లాడారు.

ఎన్నికల నోటిఫికేషన్‌కు ముందే ఎన్నికల పొత్తులు ఖరారు కావాలని, అభ్యర్థుల ఎంపిక పూర్తి కావాలని తాము అధిష్ఠానానికి సూచించామని, అందుకు అధిష్ఠానం సానుకూలంగా ప్రతిస్పందించిందని ఆయన చెప్పారు. పొత్తుల ఖరారులో, అభ్యర్థుల ఎంపికలో రాష్ట్ర నాయకత్వం పాత్ర తక్కువగా ఉంటుందని ఆయన చెప్పారు. రాష్ట్రంలో తెలుగుదేశం- బిజెపి వ్యతిరేక ఓట్లు చీలిపోకూడదని, అందుకు ప్రతిపక్షాలను అన్నింటినీ ఒకతాటి మీదికి తెచ్చే బాధ్యత ప్రధాన ప్రతిపక్షంగా తమపై ఉన్నదని ఆయన అన్నారు. ఈ దిశలో తమ అధిష్ఠానం కృషి చేస్తోందని ఆయన చెప్పారు.