ఆరోగ్యశ్రీ కార్పోరేట్ శ్రీ మాత్రమే: జెపి

విజయనగరం: ప్రభుత్వం ప్రవేశపెట్టిన పథకం ఆరోగ్య శ్రీ కాదని, కార్పోరేట్ శ్రీ అని లోక్ సత్తా వ్యవస్థాపకుడు జయప్రకాశ్ నారాయణ విమర్శించారు. ఈ విషయాన్ని నిరూపించడానికి తమ వద్ద ఆధారాలున్నాయని ఆయన మంగళవారం మీడియా ప్రతినిధుల సమావేశంలో అన్నారు. ఆరోగ్య శ్రీలో 95 శాతం డబ్బులు కార్పోరేట్ ఆస్పత్రులే కడుతున్నాయని, మిగతా 5 శాతం మాత్రమే ప్రభుత్వ ఆస్పత్రులు కడుతున్నాయని ఆయన అన్నారు.

ఏడాదంత పస్తులుంచి, ఒక రోజు బిర్యానీ పెడతామంటున్నట్లుగా ఆరోగ్యశ్రీ పథకం ఉందని, ఇది హాస్యాస్పదమని ఆయన అన్నారు. ఇది కోట్లాది మంది జీవిత సమస్య అని, లక్షలాది మంది జీవన్మరణ సమస్య అని ఆయన అన్నారు. పేదల ఆరోగ్యం గురించి మొదట మాట్లాడింది తామేనని ఆయన అన్నారు.