తెలంగాణపై మొయిలీతో విహెచ్ భేటీ

న్యూఢిల్లీ: సీనియర్ కాంగ్రెస్ నాయకుడు వి. హనుమంతరావు బుధవారం పార్టీ ఆంధ్రప్రదేశ్ వ్యవహారాల ఇంచార్జీ వీరప్ప మొయిలీని కలుసుకున్నారు. మొయిలీతో ఆయన తెలంగాణపై చెలరేగిన దుమారంపై చర్చించారు. ఈ దుమారం పార్టీకి నష్టం చేస్తుందని హనుమంతరావు వీరప్పమొయిలీతో చెప్పినట్లు సమాచారం. తెలుగుదేశం పార్టీ బుధవారం వరంగల్లులో తలపెట్టిన బిసి గర్జనపై ఆయన తీవ్రంగా విమర్శలు చేశారు.

అది బిసి గర్జన కాదని ఎన్నికల గర్జన అని ఆయన వ్యాఖ్యానించారు. తెలుగుదేశం పార్టీ ప్రభుత్వ హయాంలో చేనేత కార్మికులు ఆత్మహత్యలు చేసుకున్నారని ఆయన విమర్శించారు. తెలుగుదేశం ప్రభుత్వ కాలంలో కులవృత్తులు నష్టపోయాయని ఆయన అన్నారు. మార్చిలో తమ పార్టీ తరఫున భారీ బిసి సదస్సును నిర్వహించనున్నట్లు ఆయన తెలిపారు.