సోనియా ఎలిజబెత్ రాణి కాదు: వెంకయ్య

న్యూఢిల్లీ: తెలంగాణ కాంగ్రెస్ నేతల పట్ల ఆ పార్టీ అధ్యక్షురాలు సోనియా గాంధీ ఎలిజబెత్ రాణిలా వ్యవహరించారని భారతీయ జనతా పార్టీ (బిజెపి) సీనియర్ నేత ఎం. వెంకయ్యనాయుడు వ్యాఖ్యానించారు. తెలంగాణ కాంగ్రెస్ నాయకులకు సోనియా గాంధీ కలవడానికి అవకాశం ఇవ్వకపోవడం ఆంధ్రులను అవమానించడమేనని ఆయన మంగళవారం మీడియా ప్రతినిధలతో అన్నారు. పార్టీ అధ్యక్షురాలు తమ పార్టీ నేతలకు కలిసే అవకాశం ఇవ్వకపోవడం సిగ్గుచేటు అని, కాంగ్రెస్ లో అంతర్గత ప్రజాస్వామ్యం లేకపోవడాన్ని ఇది తెలియజేస్తోందని ఆయన అన్నారు.

వచ్చే ఎన్నికల్లో తెలంగాణ రాష్ట్ర సమితి (తెరాస)తో పొత్తు ఉండదని ఆయన స్పష్టం చేశారు. నిజాం వారసత్వాన్ని కొనసాగిస్తామని చెప్పుకుంటున్న తెరాస అధ్యక్షుడు కె. చంద్రశేఖర రావుతో ఎలా పొత్తు పెట్టుకుంటామని ఆయన ప్రశ్నించారు. తెలంగాణ రాష్ట్రం ఏర్పాటైతే ముస్లిం నాయకుడికి ఉప ముఖ్యమంత్రి పదవి ఇస్తామని కెసిఆర్ ఇచ్చిన హామీని కూడా ఆయన వ్యతిరేకించారు.