వైయస్ కాంగ్రెస్ చివరి సిఎం: దేవేందర్

హైదరాబాద్: రాష్ట్రానికి వైయస్ రాజశేఖర రెడ్డే చివరి కాంగ్రెస్ ముఖ్యమంత్రి అవుతారని తెలుగుదేశం సభ్యుడు టి. దేవేందర్ గౌడ్ అన్నారు. కాంగ్రెస్ ప్రజలను మోసం చేస్తోందని, తెలంగాణ విషయంలో చేసిన మోసం అతి పెద్దది అని ఆయన అన్నారు. తెలంగాణపై జరిగిన చర్చ సందర్భంగా ఆయన గురువారం మాట్లాడారు. తెలంగాణ అభివృద్ధి ఎప్పుడు జరిగిందో బహిరంగ చర్చకు తాము సిద్ధమని ఆయన అన్నారు. పోతిరెడ్డి పాడు ద్వారా తదితర ప్రాజెక్టుల ద్వారా తెలంగాణ నీళ్లను దోపిడీ చేస్తున్నారని, తెలంగాణ భూములను కొల్లగొడుతున్నారని ఆయన విమర్శించారు. తెలంగాణపై ప్రేమికుల మధ్య (కాంగ్రెస్, తెరాసల మధ్య) జరిగిన ఒప్పందానికి సంబంధించిన వాస్తవమేమిటో వెల్లడించాలని ఆయన డిమాండ్ చేశారు. తెలంగాణ సమస్యను అపరిష్కృత కాశ్మీర్ సమస్యతో పోల్చడమేమిటని ఆయన ప్రశ్నించారు.

తెలంగాణపై కాంగ్రెస్ అభిప్రాయం ఏమిటో చెప్పకుండా అందరి అభిప్రాయాలు అడగడమేమిటని ఆయన అడిగారు. కాంగ్రెస్ ప్రభుత్వ పాలనలో తెలంగాణ నలిగిపోతోందని ఆయన అన్నారు. తెలంగాణపై ముఖ్యమంత్రి డాక్టర్ వైయస్ రాజశేఖర రెడ్డి ఢిల్లీలో ఒక మాట ఇక్కడ మరో మాట చెబుతున్నారని ఆయన విమర్శించారు. తెలంగాణ విషయంలో ముఖ్యమంత్రి డాక్టర్ వైయస్ రాజశేఖర రెడ్డి తెరాసలో చిచ్చు పెట్టారని ఆయన అన్నారు. తెలంగాణపై దేవేందర్ గౌడ్ ముఖ్యమంత్రి రాజశేఖర రెడ్డిపై తీవ్రంగా ధ్వజమెత్తారు. తెలంగాణ సాగు నీటి ప్రాజెక్టులకు అతీ గతీ లేకుండా పోయిందని ఆయన విమర్శించారు. ప్రాణహిత - చేవెళ్ల ప్రాజెక్టు గురించి మాటలే తప్ప చేతలు లేవని ఆయన అన్నారు. తెలంగాణ అభివృద్ధపై ప్రభుత్వం చెబుతున్న మాటలు అబద్ధమని ఆయన అన్నారు.